ކަކުލުހުޅު ބަދަލުކުރުމާގުޅޭ އެއްބަސްވުމެއްގައި އައިޖީއެމްއެޗާ ޓްރީޓޮޕް އަދި އާސަންދަ އިން ސޮއިކޮށްފި

ކަކުލުހުޅު ބަދަލުކުރުމުގެ އޮޕަރޭޝަންތަކާ ގުޅޭގޮތުން އައިޖީއެމްއެޗާ ޓްރީޓޮޕް އަދި އާސަންދައިން އެއްބަސްވުމެއްގައި ސޮއިކޮށްފިއެވެ.

އެއްބަސްވުމުގައި އައިޖީއެމްއެޗްގެ ފަރާތުން ސޮއިކުރެއްވީ ސީއީއޯ އިބްރާހިމް ސަލީމްއެވެ. އާސަންދަގެ ފަރާތުން ކޮންޕެނީގެ އެމްޑީ މަރިޔަމް ޝަފީގް އަދި ޓްރީޓޮޕްގެ ފަރާތުން ސީއީއޯ ޑޭވިޑް ފެއިންބާރގްއެވެ.

ސިއްހީފަރުވާ އަވަސްކުރުމުގެ ސިޔާސަތުގެ ދަށުން މި ސޮއި ކުރެވިގެން ދިޔަ އެއްބަސްވުމުގެ ދަށުން އައިޖީއެމްއެޗްއިން ހުޅު ބަދަލުކުރުމަށް ލަފާދޭ މީހުންގެ, ހުޅުބަދަލުކުރުމުގެ ހަރަދުތައް އާސަންދައިގެ ފަރާތުން ހަމަޖެހިގެން ދާނެ ކަމަށް އައިޖީއެމްއެޗްގެ ސީއީއޯ އިބްރާހިމް ސަލީމް ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން އައިޖީއެމްއެޗްގެ ކަށީގެ ޑޮކްޓަރު މުޒުނީ ވިދާޅުވީ ހުޅު ބަދަލުކުރުމުގެ އޮޕަރޭޝަންތައް އަިޖީއެމްޗްގައި ކުރާތާ 15 އަހަރަށް ވުރެ ގިނަދުވަސް ވެފައި ވާކަމަށާއި ފުރަތަމަ ރާއްޖެއިން ބޭރުން ޑޮކްޓަރުންގެނެސްގެން މި އޮޕަރޭސަންތައް ކުރަމުން ގެންދިޔަ ނަމަވެސް މިހާރު ދިވެހި ޑޮކަޓަރުން މި އޮޕަރޭޝަން އައިޖީއެމްއެޗްގައި ކުރާތާ 13އަހަރުވެފައިވާ ކަމަށެވެ.

އިތުރަށް ވާހަކަ ދައްކަވަމުން މުޒުނީ ވިދާޅުވީ ވޭތުވެދިޔަ 15 އަހަރު ތެރޭގައި ގާތްގަނޑަކަށް 2000 މީހުންގެ ހުޅުބަދަލުކުރެވިފައިވާނެ ކަމަށާއި ރާއްޖޭގައި ހުޅުބަދަލުކުރުމުގެ އޮޕަރޭޝަން ކުރާމީހުންގެ އަދަދު ގިނަކަމަށާއި ނަމަވެސް އައިޖީއެމްއެޗްގައި ޖާގައިގެ ދަތިކަން ހުރުމުން ގިނަ ބަޔަކު ވެއިޓް ލިސްޓްގައި މަޑުކުރަން ޖެހޭ ކަމަށެވެ.

ޓްރީޓޮޕާއެކު ސޮއި ކުރެވިގެން ދިޔަ އެގްރީމެންޓްގެ ސަބަބުން ޓްރީޓޮޕްގެ ސާރޖަންސް އަދި ވަސީލަތްތައް ބޭނުންކޮށްގެން ވެއިޓިންގ ލިސްޓްގައި ތިބި މީހުންގެ އަދަދު މަދު ކުރެވޭނެ ކަމަށް ވެސް މުޒުނީ ވިދާޅުވިއެވެ.

ރަސްމިއްޔާތުގައި ވާހަކަ ދައްކަވަމުން އާސަންދައިގެ އެމްޑީ މަރިޔަމް ޝަފީގް ވިދާޅުވީ މިއަދު ސޮއި ކުރެވިގެން މިދިޔަ އެގްރީމެންޓްގެ ސަބަބުން ލިބޭ ޕެކޭޖުން ހުޅުބަދަލުކުރުމަށް 65000 ރުފިޔާ ލިބިގެން ދާނެ ކަމަށާއި މަގުސަދަކީ ބަލިމީހާގެ އަތުން އިތުރު ހަރަދެއް ނުގޮސް ހިދުމަތް ލިބިގެން ދިޔުން ކަމުގައި ވިދާޅުވިއެވެ.