ފިކުރީ ގޮތުން ހައްދުފަހަނައަޅާ ދިޔުން ހުއްޓުވުމާ ގުޅޭ ދެ ދުވަހުގެ ވާރކްޝޮޕެއް ފަށައިފި

ފިކުރީ ގޮތުން ހައްދުފަހަނައަޅާ ދިޔުން ހުއްޓުވުމަށާއި އެކަމާ ގުޅޭ ގޮތުން ދީނީ އިލްމުވެރިންނަށް ކުރެވިދާނެ ކަންކަމާާ ގުޅޭ ދެ ދުވަހުގެ ވާރކްޝޮޕެއް ބުދަ ދުވަހު ފަށައިފިއެވެ.

ނޭޝަނަލް ކައުންޓަރ ޓެރަރިޒަމް ސެންޓަރު (އެންސީޓީސީ) އިން އިސްނަގައިގެން އަބޫދާބީގެ ހިދާޔާ ސެންޓަރާ ގުޅިގެން ކުރިއަށްގެންދިޔަ މި ވާރކްޝޮޕް ފެށުމުގެ ރަސްމިއްޔާތު ބުދަ ދުވަހު ބާއްވާފައިވާއިރު، މި ރަސްމިއްޔާތު އިފްތިތާހު ކޮށްދެއްވީ އެޑިއުކޭޝަން މިނިސްޓަރ ޑރ. އާއިޝަތު އަލީއެވެ. އޭގެ އިތުރުން، ޑިފެންސް މިނިސްޓަރ މާރިޔާ އަހުމަދު ދީދީ އާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުުﷲ ޝަމާލް އާއި، ޕޮލިސް ކޮމިޝަނަރު މުހައްމަދު ހަމީދުގެ އިތުރުން، ސަރުކާރުގެ ބައެއް އިސްވެރިންނާއި، ޔޫއެންޑީޕީގެ ރެސިޑެންޓް ރިޕްރެޒެންޓޭޓިވުން ބައިވެރިވެ ވަޑައިގެންފައި ވެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން އެންސީޓީސީގެ ޑިރެކްޓަރ އިބްރާހިމް ނައީމް ވިދާޅުވީ، ފިކުރީ ގޮތުން ހައްދުފަހަނައަޅާ ދިއުމަކީ މިއަދު ސަމާލުކަންދޭން ޖެހިފައިވާ މައްސަލައެއް ކަމަށާއި، ފަހުގެ ތާރީޚުގައި ދުނިޔޭގެ ކަންކޮޅު ތަކުގައި ހިނގާފައިވާ ބައެއް ޓެރަރިސްޓު ހަމަލާތަކުންވެސް އެކަން ދޭހަވާ ކަމަށެވެ. އެގޮތުން ނައީމް ވަނީ ކްރައިސްޗާރޗް ހަމަލާއަށް އަލިއަޅުވާލައްވާފައެވެ.

ޓެރަރިޒަމާއި ފިކުރީ ގޮތުން ހައްދުފަހަނައަޅާ ދިއުން ފަދަ ކަންކަމާ ދެކޮޅަށް ކުރައްވާ މިފަދަ މަސައްކަތްތަކަށް ޑިފެންސް މިނިސްޓަރަށް ޝުކުރު އަދާ ކުރައްވަމުން ނައީމް އިތުރަށް ވިިދާޅުވީ، މިފަދަ ކަންކަމާ ދުރުހެލި މުޖުތަމައެއް ބިނާ ކުރުމަށްޓަކައި އަސްކަރީ ބާރުތަކުގެ އިތުރުން ސަރުކާރާއި، މުޅި މުޖުތަމައުގެ އެހީތެރިކަން ވެސް ބޭނުންވާ ކަމަށެވެ.

މި ރަސްމިއްޔާތު ޝަރަފުވެރި ކޮށްދެއްވަމުން އެޑިއުކޭޝަން މިނިސްޓަރ އާއިޝަތު އަލީވެސް ވާހަކަފުޅު ދައްކަވާފައިވާއިރު، މިފަދަ ވޯރކްޝޮޕްތަކުގެ މުހިއްމުކަމާ ގުޅޭގޮތުން މިނިސްޓަރ ވިދާޅުވީ، ފިކުރީ ގޮތުން ހައްދުފަހަނައެޅުމުގެ ބިރު މަޑުމަޑުން ނަމަވެސް އުފެދެމުންދާ ކަމަށާއި، އެކަމުގެ ޝިކާރައަކަށް ގިނައިން ވަނީ ޒުވާނުން ކަމަށެވެ. އެގޮތުން ޒުވާނުން އެފަދަ ކަންކަމުގެ ޝިކާރައަކަށް ވެގެންދަނީ ތައުލީމެއް ނުވަތަ ވަޒީފާއެއް ނެތިގެން ނޫން ކަމަށާއި، ރަނގަޅަށް ތައުލީމު ހާސިލުކޮށްގެން ތިބޭ ޤާބިލު ޒުވާނުން ވެސް މި އަވައިގައި ޖެހެމުންދާ ކަމަށެވެ.

މިނިސްޓަރުގެ ވާހަކަފުޅުގައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ "ޒީރޯ ޓޮލެރެންސް ޓު ޓެރަރިޒަމް" ގެ ސިޔާސަތުތައް ތަންފީޒު ކުރުމަށް ޑިފެންސް މިނިސްޓްރީން ކުރާ މަސައްކަތްތައް ފާހަގަކޮށް އެކަމަށްޓަކައި ޝުކުރުއަދާ ކުރައްވާފައެވެ.