ބޮޑުފޮޅަދޫ ފުޓްސަލް މުބާރާތް ފަށައިފި

ލެގޫން ވިޔު ޔުނިސަން ފުޓްސަލް ޗެލެންޖް ނަމުގައި ބޮޑުފޮޅަދޫ ކައުންސިލުން އިސްނަގައިގެން ފުޓްސަލް މުބާރާތެއް ފަށައިފިއެވެ.

އަންގާރަ ދުވަހުގެރޭ ފެށި މި މުބާރާތަކީ 2013 ވަނަ އަހަރުން ފެށިގެން ބޮޑުފޮޅަދޫ ކައުންސިލުން އއ. އަތޮޅަށް ހުޅުވައިލައިގެން ކުރިޔަށް ގެންދާ މުބާރާތެކެވެ. މިއަހަރުގެ މުބާރާތުގައި ޖުމްލަ 8 ޓީމު ވާދަކުރާއިރު، މުބާރާތުގެ މެޗުތައް ކުރިޔަށް ގެންދަނީ ދެ ގުރޫޕަކަށް ބަހައިލައިގެންނެވެ.

މި އަހަރުގެ މި މުބާރާތުގައި ކޮންމެ ޓީމަކުން އެވްރެޖްކޮށް 60،000 ރުފިޔާ ޚަރަދު ކޮށްފައިވާއިރު، ރާއްޖޭގެ މަޝްހޫރު ގިނަ ފުޓްސަލް ކުޅުންތެރިން މި މުބާރާތުގައި ފެނިގެން ދާނެ ކަމަށް ބޮޑުފޮޅަދޫ ކައުންސިލުން ބުނެއެވެ. އަދި މި މުބާރާތުގައި އަންގާރަ ދުވަހުގެރޭ ތިން މެޗް ކުޅެފައިވެއެވެ.

ފުރަތަމަ މެޗުގައި އަފިޔަންސް އަދި ކަރާއެފްސީ ބައްދަލު ކުރިއިރު، މި މެޗް 4-0 ކާމިޔާބު ކުރީ އަފިޔަންސްއެވެ. އަދި ވައިޕީ ސްޓާރސް އަދި ގޭދޮށުޓީމު ބައްދަލުކުރި މެޗް 5-0 ގެ ނަތީޖާއަކުން ވައިޕީ ސްޓާރސް ވަނީ ކާމިޔާބު ކޮށްފައެވެ.

ޔޫއެސްސީ އަދި ޔަންގް ޕްލޭޔާރސް ބައްދަލުކުރި މެޗް 12-0 ޔަންގް ޕްލޭޔާރސް ވަނީ ކާމިޔާބު ކޮށްފައެވެ. މި މުބާރާތުގެ ފައިނަލް ކުޅޭނީ 2 ޖުލައިގައެވެ. މުބާރާތުގެ ޗެމްޕިއަން ޓީމަށް 20،000 ރުފިޔާ ލިބޭނެއެވެ.