ދިވެހިރާއްޖޭގައި އުފައްދާ މަހުގަ ބާވަތްތަކުގެ އުފެއްދުންތައް ރަޝިޔާއަށް އެކްސްޕޯޓް ކުރުން އިތުރުކުރުމާއި ގުޅޭގޮތުން ދެ ގައުމުގެ ޙާރިޖިއްޔާއިން މަޝްވަރާ ކޮށްފިއެވެ.

ހާރިޖީ ވަޒީރު އަބްދުﷲ ޝާހިދު މިހާރު ރަޝިޔާއަށް ކުރައްވަމުން ގެންދަވާ ރަސްމީ ދަތުރުފުޅުގައި އެ ގައުމުގެ ހާރިޖީ ވަޒީރު ސާރގޭ ލަވްރޯވްއާ އެކު ބޭއްވެވި ބައްދަލުކުރެއްވުމުގައި މަސްވެރިކަމުގެ ދާއިރާގެ އިތުރުން، އެހެނިހެން ދާއިރާތަކުން ވެސް ދެ ގައުމުގެ ގުޅުން އިތުރަށް ވަރުގަދަކުރުމާއި ގުޅޭ ގޮތުން މަޝްވަރާ ކޮށްފައިވެއެވެ.

އެގޮތުން ފަތުރުވެރިކަމުގެ ދާއިރާއާއި، މޫސުމަށް އަންނަ ބަދަލުތަކާއި އަދި ޓެރަރިޒަމްއާ ދެކޮޅަށް ދެ ގައުމު އެކުގައި މަސައްކަތްކުރުމާ ގުޅޭ ގޮތުން މަޝްވަރާކޮށްފައިވެއެވެ.

ހާރިޖީ ވަޒީރުގެ މި ދަތުރުފުޅުގައި، ދެ ގައުމުގެ ދެމެދުގައި ވަނީ 90 ދުވަހުގެ އޮން އެރައިވަލް ވިސާ އެގްރީމަންޓެއްގައި ވެސް ސޮއިކޮށްފައެވެ. އެގޮތުން އަންގާރަ ދުވަހު ސޮއިކުރެވުނު ވިސާ ވެއިވަރ އެއްބަސްވުމުގެ ދަށުން ދެ ގައުމުގެ ރައްޔިތުންނަށް ވެސް 90 ދުވަހުގެ މުއްދަތަށް އޮން އެރައިވަލް ވިސާ ލިބިގެން ދާނެއެވެ.