ހިޔާ މަޝްރޫއުގެ ފްލެޓްތަކަށް ކުލީގެ ގޮތުގައި ޖެހެނީ މަހަކަށް 11،000 ރުފިޔާ!

ރައީސް ޔާމިންގެ ސަރުކާރުގައި ފެށި ހިޔާ މަޝްރޫއުގެ ފްލެޓްތަކުގެ އެޕާޓްމަންޓަކަށް މަހު ކުލީގެ ގޮތުގައި ގާތްގަނޑަކަށް 11،000 ރުފިޔާ ދައްކަން ޖެހޭނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.

ހައުސިންގ ޑިވޮލޮޕްމެންޓް ކޯޕަރޭޝަން ( އެޗްޑީސީ ) އިން އަންގާރަ ދުވަހު ރައީސް އޮފީހުގައި ބޭއްވި ޕްރެސްކޮންފަރެންސް ގައި، އެޗްޑީސީގެ ޑެޕިއުޓީ މެނޭޖިން ޑިރެކްޓަރ އަހުމަދު އާތިފް ވިދާޅުވީ، ހުރިހާ ހަރަދަތުތައް އެކުލެވޭ ގޮތަށް ޔުނިޓަކަށް ޖެހޭނީ 82،496 ޑޮލަރު ކަމަށެވެ. އެއީ ދެ ކޮޓަރީގެ އެޕާޓްމެންޓަކަށް 1.2 މިލިއަން ރުފިޔާއެވެ. މިހާރުގެ މާކެޓް ރޭޓާއި އިންޑަސްޓްރީގެ އަގުތަކަށް ބަލާއިރު ދެ ބެޑް ރޫމްގެ އެޕާޓްމެންޓަށް ޖެހޭ 82 ހާސް ޑޮލަރު އެއީ ބޮޑު އަގެއް ކަމަށް އޭނާ ވިދާޅުވިއެވެ.

Advertisement

ކުރިން 7000 ފްލެޓް ހިމަނަން ނިންމާފައިވިޔަސް މަޝްވަރާތަކެއް ކުރެވި، އިމާރާތުގެ ތިރީގައި ކޮމާޝަލް ކަންތައްތަކަށް ޔުނިޓްތައް ބަހައްޓަން ނިންމާފައިވާތީ އެ އަދަދު ވަނީ 6850 އަށް ދަށްކުރެވިފައެވެ.

ސުހައިލް ވިދާޅުވީ، 7000 ޔުނިޓަކީ ވެސް ދެ ކޮޓަރީގެ އެޕާޓްމެންޓް ކަމަށެވެ. އެޕާޓްމެންޓްގެ ބޮޑު މިނަކީ 750 އަކަފޫޓެވެ. އެއިން ކޮންމެ އެޕާޓްމެންޓެއް ގައި ދެ ކޮޓަރި އާއި ދެ ފާހަނާ ހުންނައިރު ބަދިގެއާއި ކާގެ ހުންނަނީ އެއްކޮށް ހުންނަ ހޯލެއްގެ ގޮތަށެވެ.

ނޫސްވެރިއަކު ކުރި ސުވާލަކަށް ޖަވާބުދެމުން ސުހައިލް ވިދާޅުވީ، ކުރިން ޕްރްޖެކްޓް ކުރެވުނު އިރު '' ފިނިޝިން'' މަސައްކަތް ނުހިމެނޭ ކަމަށެވެ. އެގޮތުން އެކަން ނިންމަން 42 މިލިއަން ޑޮލަރު ހަރަދުވާއިރު އެކަންތައް ނިމެން ވެސް އިތުރު ތިން މަސް ނަގާނެ ކަމަށެވެ.

އެހެން ކަމުން ލަފާކުރެވޭ ގޮތުން ޕްރޮޖްކެޓްގެ މަސައްކަތް ނިމެނޭނީ އަންނަ އަހަރު ކުރީކޮޅު ކަމަށް ސުހައިލް ވިދާޅުވިއެވެ. އެގޮތުން އަންނަ އަހަރުގެ ފެބްރުއަރީ ނުވަތަ މާޗް މަހުގެ ތެރޭގައި އެ ފްލެޓްތަކަށް ވަދެވޭނެ ކަމަށް އެޗްޑީސީން މައުލޫމާތު ދީފައިވެއެވެ.