ސުޕްރީމް ކޯޓުގެ ފަނޑިޔާރުންގެެ އަދަދު 7 އަށް ބަދަލުކުރަނީ

ސުޕްރީމް ކޯޓުގެ ފަނޑިޔާރުންގެ އަދަދު 7 އަށް ބަދަލުކުރުމަށް ނިންމައި، އެކަމުގެ މަސައްކަތްތައް ފަށައިފި އެވެ.

ރާއްޖެ.އެމްވީއަށް އިތުބާރުހުރި މަސްދަރުތަކުން އެނގިފައިވާގޮތުގައި ސުޕްރީމް ކޯޓުގެ ފަނޑިޔާރުންގެ އަދަދު 7 އަށް ބަދަލުކުރުމަށް ނިންމައި، ޤާނޫނަށް ގެންނަންޖެހޭ ބަދަލުތައް ޑްރާފްޓްކުރުމުގެ މަސައްކަތް އަންްނަނީ ކުރަމުންނެވެ. އަދި އެކަމުގައި އެމްޑީޕީ ޕާލިމެންޓްރީ ގުރޫޕްގެ އިސް ބޭފުޅުންނާއި މަޝްވަރާތައްކުރެވިފައިވާކަން އެނގިފައިވެއެވެ.

ރާއްޖެ.އެމްވީއަށް މައުލޫމާތު ހިއްސާކުރި ފަރާތުން ބުނީ، ސުޕްރީމް ކޯޓުގެ ފަނޑިޔާރުންގެ އަދަދު 7 އަށް ބަދަލުކުރަނީ ޤާނޫނު އަސާސީ ތަސައްވަރުކުރި ފަދަ ސުޕްރީމް ކޯޓެއް އެކުލަވާލުމުގެ މަޤްސަދުގައިކަމަށެވެ. އަދި މަސައްކަތް ނިންމައި، މި ދައުރުގެ ތެރޭގައި ޤާނޫނު އިސްލާހްކުރުމަށް ހުށަހެޅުމަށް މަސައްކަތް ކުރަމުން އަންނަކަމަށް އެ ފަރާތުން ވިދާޅުވި އެވެ.

އައު ޤާނޫނު އަސާސީގެ ދަށުން އެކުލަވާލެވުނު ސުޕްރީމް ކޯޓުގައި ފުރަތަމަ ތިއްބެވީ 7 ފަނޑިޔާރުންނެވެ. އެގޮތުން ކޯޓުތަކުގެ ޤާނޫނުގައި އޭރުގައި ބުނެފައިވާގޮތުން އުއްތަމަ ފަނޑިޔާރާއެކު ސުޕްރީމް ކޯޓުގައި ތިއްބަވާނީ 6 ފަނޑިޔާރުންްނެވެ. ނަމަވެސް 7 ފަނޑިޔާރުުންގެ އަދަދު، 5 ފަނޑިޔާރުންނަށް ބަދަލުކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނު ބޭނުންވާގޮތަށް ސުޕްރީމް ކޯޓުގެ ކޮންޓްރޯލް ނެގުމަށެވެ.

2014 ވަނަ އަހަރުގެ ޑިސެމްބަރު މަހު ކޯޓުތަކުގެ ޤާނޫނަށް ގެނައި އިސްލާހާއެކު، ފަނޑިޔާރުންގެ އަދަދު 5 ފަނޑިޔާރުންނަށް ބަދަލުކޮށް، އުއްތަމަ ފަނޑިޔާރަކު އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދީފައިވެއެވެ. ކޯޓުތަކުގެ ޤާނޫނަށް ގެނައި އެ އިސްލާހާއެކު، މަޤާމުން ދުރުކުރީ އޭރުގެ އުއްތަމަ ފަނޑިޔާރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާނު އެވެ. އެ ދެ ފަނޑިޔާރުންނަކީ، އޭރުގައި ސުޕްރީމް ކޯޓުން ނެރުނު ހުކުމްތަކުގައި ރައުޔު ތަފާތުވާ ދެ ފަނޑިޔާރުންނެވެ.