އެމެރިކާގެ ރައީސް ޑޮނާލްޑް ޓްރަމްޕް ވެރިކަމަށް ވަޑައިގެންނެވުމުގެ ކުރިން، އަންހެނަކަށް ޖިންސީ ފުރައްސާރަ ކުރި ކަމަށް ބުނެ އޭނާއަށް ކުރި ތުހުމަތަކީ "ފްލޯކު" ވާހަކައެއް ކަމަށް ޓްރަމްޕް ވިދާޅުވެއްޖެއެވެ.

ޖިންސީ ފުރައްސާރަ ރައްދުވި، ނޫސްވެރިޔާ، އީޖީން ކެރޮލް ބުނެފައިވަނީ، ނަވާރަ ސަތޭކަ ނުވަދިހައިގެ އަހަރުތަކުގައި ފިހާރައެއްގެ ޑްރެސިންގ ރޫމެއްގެ ތެރެއިން ޓްރަމްޕް ވަނީ އޭނާއަށް ޖިންސީ ފުރައްސާރަ ކޮށްފައި ކަމަށެވެ. ނަމަވެސް، ޓްރަމްޕް ވަނީ މިކަން ދޮގުކޮށް އެއީ ކެރޮލްގެ އާ ފޮތެއް ނެރުމަށް، މަޝްހޫރު ވުމުގެ ގޮތުން ދައްކާ ވާހަކައެއް ކަމެއް ކަމަށް ވިދާޅުވެފައެވެ.

މި ތުހްމަތު ކުރިން ރިޕޯޓު ކޮށްފައިނުވާނެ ކަމަށާއި އެކަން އެގޮތަށް ކުރީ ކޯޓުގައި އޭނާއަށް ކުރި ނުލިބޭނެ ކަމަށް ގަބޫލު ކުރެވުމުން ކަމަށް ކެރޮލް ބުނެފައިވެއެވެ.

ޓްރަމްޕްގެ މައްޗަށް މިފަދަ ތުހުމަތެއް ކުރެވުނު މިއީ ފުރަތަމަ ފަހަރެއް ނޫނެވެ. މީގެ ކުރިންވެސް އެތަކެއް އަންހެނަކު ވަނީ ޓްރަމްޕް އެ މީހުންނަށް ޖިންސީ ފުރައްސާރަ ކުރިކަމަށް ބުނެ ތުހުމަތު ކޮށްފައެވެ.

ޓްރަމްޕް، ކެރޮލް އަށް ޖިންސީ ފުރައްސާރަ ކުރެއްވި ކަމަށް ބުނި ފިހާރަ، ބާރގްޑޯފް ގުޑްމޭން އިން މި މައްސަލައާމެދު ބުނެފައިވަނީ ޓްރަމްޕް އެފަދަ ކަމެއް ކުރެއްވި މަންޒަރު ފެންނަ ފަދަ ވީޑިއޯ ފުޓެޖެއްވެސް އެމީހުންގެ އަތުގައި ނެތް ކަމަށެވެ. އަދި މިކަމާމެދު ޓްރަމްޕް ވަނީ އެމީހުންނަށް ޝުކުރުވެރިވެފައެވެ.