ސުޕަރ މެޖޯރިޓީ އޮތަސް ޑިމޮކްރަސީއަށް އިހްތިރާމް ކުރަން ޖެހޭނެ: ސްޕީކަރ ކަރޫ ޖަޔަސޫރިޔާ
22 ޖޫން 2019 | ހޮނިހިރު 10:12މުހިއްމީ ކުޑަ ނުވަތަ ބޮޑު މެޖޯރިޓީ ނޫން ކަމަށާއި، މުހިއްމީ ޑިމޮކްރަސީގެ ސިފަތަކުގައި ހިފަހައްޓާ، އެއަށް އިހްތިރާމް ކުރުން ކަމަށް
ސްޕީކަރ ކަރޫ ޖަޔަސޫރިޔާ ރައްޔިތުންގެ މަޖިލިސްގެ ރައީސް އަދި ނައިބް ރައީސް އާއި ބައްދަލުކުރައްވަނީ
ރައްޔިތުންގެ މަޖިލީހުގެ ސުޕަރ މެޖޯރިޓީ ވެރިކަން ކުރާ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބިފައި އޮތަސް, ޑިމޮކްރަސީއަށް އިހްތިރާމް ކުރަންޖެހޭނެ ކަމަށް ސްރީލަންކާގެ ގާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާ ވިދާޅުވެއްޖެއެވެ.
ޕާލަމެންޓް ސްޕީކަރ ކަރޫ ޖަޔަސޫރިޔާ "ރާއްޖެ އެމްވީ" އަށް ދެއްވި ޚާއްސަ އިންޓަރވިއުއެއްގައި ވިދާޅުވީ، މުހިއްމީ ކުޑަ ނުވަތަ ބޮޑު މެޖޯރިޓީ ނޫން ކަމަށާއި، މުހިއްމީ ޑިމޮކްރަސީގެ ސިފަތަކުގައި ހިފަހައްޓާ، އެއަށް އިހްތިރާމް ކުރުން ކަމަށެވެ.
ސްޕީކަރ ކަރޫ ޖަޔަސޫރިޔާ ވިދާޅުވީ ގާނޫނު ހަދާ މަޖިލިސްގެ މެމްބަރުންނަކީ ރައްޔިތުންގެ ޚާދިމުން ކަމަށާއި، އެ ވިސްނުމުގައި މަސައްކަތް ކޮށްފިނަމަ، އެއްވެސް ކަމެއް ގޯސްކޮށް ނުދާނެ ކަމަށެވެ.
ރާއްޖޭގެ ރައްޔިތުންގެ މަޖިލީހުގެ މެމްބަރުންނަށް, ލަންކާގެ ގާނޫނު ހަދާ މަޖިލީހުގެ ކޮމިޓީތައް ކުރިއަށް ދާ ގޮތް ބައްލަވާލެއްވުމުގެ ފުރުސަތު ދެއްވާނެ ކަމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ބައްދަލުކުރައްވާ ދެއްކެވި ވާހަކަފުޅުގައި ސްޕީކަރ ކަރޫ ޖަޔަސޫރިޔާ ވަނީ ވިދާޅުވެފައެވެ.
ކަރޫ ޖަޔަސޫރިޔާ އަކީ ސްރީލަންކާގައި ވަރަށް ތަޖްރިބާކާރު ސިޔާސީ ލީޑަރެކެވެ. 2015 ވަނަ އަހަރުން ފެށިގެން ކަރޫ ޖަޔަސޫރިޔާ އަންނަނީ ސްރީލަންކާގެ ޕާލަމެންޓް ސްޕީކަރ ކަން ކުރައްވަމުންނެވެ.
ބޮޑު ވަޒީރުގެ މަގާމުގައި ރަނިލް ވިކްރަމަސިންހަ ހުންނަވަނިކޮށް، ރަނިލް އާއި މައިތިރި ޕާލަސިރިސޭނަ އާއި ދެމެދު އުފެދުނު ސިޔާސީ ހަމަނުޖެހުމުގައި، އެ މަގާމަށް ކުރީގެ ރައީސް މަހިންދާ ރާޖަޕަކްސާ ،ސިރިސޭނާ ހަމަޖެއްސެވުމާއި ގުޅިގެން ލަންކާގައި އުފެދުނު ސިޔާސީ ހަލަބޮލިކަން، ކަރޫ ޖަޔަސޫރިޔާ އިސްކޮށް ހުންނަވާ ގާނޫނު ހަދާ މަޖިލިސް ތެރެއިން ހައްލު ކުރެއްވި ގޮތަށް، ދުނިޔޭގެ ގައުމުތަކުގެ ސިޔާސީ ލީޑަރުންވަނީ އޭނާ އަށް ތައުރީފް ކޮށްފައެވެ.
ލަންކާގެ ގާނޫނުގައި ހަދާ މަޖިލީހުގައި 225 މެމްބަރުން ހިމެނިވަޑައިގަންނަވައެވެ.
