ކަޕް އޮފް ނޭޝަންސް: ފުރަތަމަ މެޗުން މިސްރު މޮޅުވެއްޖެ

އެފްރިކާ ކަޕް އޮފް ނޭޝަންސްގައި ކުޅުނު ފުރަތަމަ މެޗުން މުބާރާތް ބާއްވާ ގައުމު މިސްރުން ކާމިޔާބުކޮށްފިއެވެ.

ހުކުރު ދުވަހުގެ ރޭ ގްރޫޕް އޭގައި ކުޅުނު މެޗުން ފެވަރިޓުންގެ ގޮތުގައި ބެލެވޭ މިސްރު މޮޅުވީ ޒިމްބާބްވޭއާ ވާދަކޮށް 0-1 ގެ ނަތީޖާއަކުންނެވެ.

މިސްރުގައި ކުޅުނު މި މެޗު ފަށައިގެން އެ ގައުމުން ވަނީ މޮޅު ކުޅުމެއް ދައްކާފައެވެ. އެގޮތުން ޒިމްބާބްވޭގެ ހާފަށް ބާރުބޮޑުކޮށް، ލަނޑު ޖެހުމަށް ފުރުސަތުތަކެއް ތަނަވަސްކުރިއެވެ.

މި ހާފްގައި ޒިމްބާބްވޭގެ ފަރާތުން މާ އެދެވޭ ހަމަލާއެއް ފެނިގެންނުދިޔަ ނަމަވެސް، އެޓީމުން ވަނީ މިސްރުން ފޮނުވާލި ހަމަލާތައް ދިފާއުކޮށް، މޮޅު ޑިފެންސެއް ކޮށްފައެވެ.

ފުރަތަމަ ހާފް ނިމުމުގެ ކުރިން މިސްރުން ވަނީ މެޗުގެ ލީޑު ނަގާފައެވެ. މި ލަނޑު 41 ވަނަ މިނެޓުގައި އެޓީމަށް ކާމިޔާބުކޮށްދިނީ ޓްރެޒުގޭޓްއެވެ. މިއީ މި މުބާރާތުގައި އޭނާ ކާމިޔާބުކުރި ފުރަތަމަ ލަނޑެވެ.

ދެވަނަ ހާފްގައި ދެޓީމުގެ ފަރާތުންވެސް ދާދި ހަމަހަމަ ކުޅުމެއް ފެނިގެންދިޔައިރު، ލަނޑު ޖެހުމަށް މިސްރުން ވަނީ ފުލުފުލުގައި ގިނަ ފުރުސަތުތަކެއް ހޯދާފައެވެ. ނަމަވެސް ޒިމްބާބްވޭއިން ވަނީ މި ހާފްގައިވެސް މޮޅު ޑިފެންސެއް ކޮށްފައެވެ.

މި ނަތީޖާއާއެކު މިސްރު ވަނީ ކަޕް އޮފް ނޭޝަންސްގެ ގްރޫޕް ސްޓޭޖުގައި ބަލިނުވެ 14 މެޗު ހަމަކޮށްފައެވެ. އެޓީމު ކުޅުނު 14 މެޗުގެ ތެރެއިން 10 މެޗުން މޮޅުވިއިރު، ހަތަރު މެޗު ނިމުނީ އެއްވަރުވެގެންނެވެ.

މުބާރާތުގައި ހޮނިހިރު ދުވަހުވެސް މެޗެއް ކުޅުމަށް ވަނީ ހަަމަޖެހިފައެވެ. ގްރޫޕް އޭގައި ހިމެނޭ ކޮންގޯ އާއި އުގާންޑާ ބައްދަލުކުރާ މި މެޗު ފަށާނީ ރާއްޖެ ގަޑިން ހޮނިހިރު ދުވަހުގެ ރޭ 19:30 ގައެވެ.

މިފަހަރުގެ މުބާރާތުގައި 24 ޓީމު ވާދަކުރާއިރު، މިއީ މުބާރާތުގެ ތާރީހުގައި އެންމެ ގިނަ ޓީމު ވާދަކުރާ ފަހަރެވެ.