އިހަވަންދުއަށް ސްޕީޑް ފެރީގެ ޚީދުމަތް ދޭން ފަށައިފި
21 ޖޫން 2019 | ހުކުރު 16:07މިއީ ހއ. އަދި ހދ. ގެ ބައެއް ރަށްރަށަށް ދަތުރުކުރާ ފެރީގެ ޚިދުމަތެއް
ނައިބު ރައީސް ފައިސަލް ނަސީމް
ހއ. އިހަވަންދޫގައި ސްޕީޑް ފެރީގެ ޚިދުމަތް ދޭން ފަށައިފި އެވެ.
އިހަވަންދޫގައި ސްޕީޑް ފެރީގެ ޚިދުމަތް ތައާރަފް ކޮށްދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމް ތިލަދުންމަތީ އުތުރުބުރީގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އިހަވަންދޫ އަށް ހުކުރު ދުވަހު ކުރެއްވި ޒިޔާރަތުގައެވެ.
މީގެ އިތުރުން ނައިބު ރައިސާއިއެކު އިހަވަންދޫ ކައުންސިލުން ބޭއްވި ބައްދަލުވުމުގައި އެރަށު ކައުންސިލުން ވަނީ އެ ރަށުގެ ރައްޔިތުންނަށް ދިމާވެފައިވާ ގޮންޖެހުންތަކާ ބެހޭ މަޢުލޫމާތު ނައިބު ރައީސާއި މައުލޫމާތު ހިއްސާ ކުރައްވާފަ އެވެ. އޭގެތެރޭގައި ކުނީގެ މައްސަލައާއި، ރަށުގެ ބަނދަރު ބޮޑުކުރުމާ ބެހޭގޮތުންނާއި އަދި ކައުންސިލުން ދޭ ޚިދުމަތްތައް ފުޅާކުރުން ހިމެނެއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، އެމަނިކުފާނުގެ މި ފަދަ ދަތުރުފުޅުތަކުގެ ބޭނުންފުޅަކީ ރައްޔިތުންނާ ވީހާވެސް ގާތުން މަސައްކަތް ކުރެއްވުންކަމަށާއި، އެގޮތުން ރައްޔިތުންނަށް އެންމެ މުހިންމު ކަންކަމަށް އިސްކަން ދީގެން ސަރުކާރުން މަސައްކަތް ކުރައްވާނެކަމުގައި ވިދާޅުވިއެވެ.
އިހަވަންދޫގައި އިފްތިތާޙް ކުރެއްވި ސްޕީޑް ފެރީގެ ޚިދުމަތަކީ ހއ. އަދި ހދ. ގެ ބައެއް ރަށްރަށަށް ދަތުރުކުރާ ފެރީގެ ޚިދުމަތެކެވެ.
އެމަނިކުފާނުގެ މި ޒިޔާރަތުގައި އިހަވަންދޫ ސްކޫލަށާއި، ޞިއްޙީ މަރުކަޒަށާއި، އިންޖީނުގެއަށް ޒިޔާރަތްކުރައްވައި، އެ މުޢައްސަސާތަކުގެ މުވައްޒަފުންނާ ބައްދަލުކުރައްވައި، މަޝްވަރާކުރެއްވިއެވެ.
