ނައިބުރައީސް ފައިސަލް ނަސީމް ތިލަދުންމަތީ އުތުރުބުރީގެ ބައެއް ރަށްރަށަށް މިހާރުކުރައްވަމުންގެންދަވާ ދަތުރުފުޅުގައި ހއ. މާރަންދޫއަށް ހުކުރުދުވަހު ޒިޔާރަތްކުރައްވައިފިއެވެ.
މާރަންދޫގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ފައިސަލް ވިދާޅުވީ، ސަރުކާރުގެ ސިޔާސަތަކީ އެއްވެސް ކަމެއްގައި ވަކި ރަށެއް ތަފާތު ނުކުރެއްވުންކަމަށާއި، އަދި ސަރުކާރުން ތަޢުލީމާއި، ޞިއްޙީ ކަންކަމަށް ޚާއްޞަ ސަމާލުކަމެއް ދެއްވާނެ ކަމަށެވެ. އަދި އެކަންކަމުގައި ރައްޔިތުންނަށް ހެޔޮ ބަދަލުތަކެއް ފެންނާނެކަމުގައި އެމަނިކުފާނު ވިދާޅުވިއެވެ.
ނައިބުރައީސްގެ މި ޒިޔާރަތުގައި މާރަންދޫ ސްކޫލަށާއި ޞިއްޙީ މަރުކަޒުގެ އިތުރުންއިންޖީނުގެއަށް ޒިޔާރަތްކުރައްވައި، އެ މުއައްސަސާތަކުގެ މުވައްޒަފުންނާ ބައްދަލުކުރައްވައި އެތަންތަނުގެ މަސައްކަތްތައް ކުރިއަށްދާގޮތް އޮޅުންފިލުއްވައި، އެތަންތަނުގެ މިހާރުގެ ހާލަތު ވަނީ ބައްލަވާލައްވާފައެވެ.
ރައީސުލްޖުމްހޫރިއްޔާގެ ނައިބުގެ މި ޒިޔާރަތުގައި މާރަންދޫ ކައުންސިލްގެ މެންބަރުންނާ ބައްދަލުކުރެވުމަށްވެސް ވަނީ ހަމަޖެހިފައެވެ.
