ގައުމު ތަރައްގީ ވާނީ ގައުމުގެ ވަކިވަކި ފަރުދުންނަށް ލިބޭ ކުރިއެރުންތަކާއެކު: ރައީސް ސޯލިހު
20 ޖޫން 2019 | ބުރާސްފަތި 14:40ގައުމީ ތަރައްގީއާ ގެންގުޅޭގޮތުން ގެންގުޅޭ އެންމެ އިސް ސިޔާސަތަކީ މީހުން ބިނާ ކުރުން
ރައީސް އިބްރާހިމް މުހައްމަދު ސޯލިހު
ގައުމު ތަރައްގީ ވާނީ ގައުމުގެ ވަކިވަކި ފަރުދުންނަށް ލިބޭ ކުރިއެރުންތަކާއެކު، ކޮންމެ ފަރުދެއްގެ އިލްމީ ގާބިލްކަން އިތުރު ކުރެވުނު މިންވަރަކުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މިދިޔަ އަހަރު ޖީސީއީ އޭ-ލެވެލް އިމްތިޙާނުގައި ބައިވެރިވި ދަރިވަރުންގެ ކާމިޔާބީ ފާހަގަކޮށް ރައީސުލްޖުމްހޫރިއްޔާގެ ހާއްސަ ސްކޮލަރޝިޕާއި، ހައި އެޗީވަރސް ސޮކްލަރޝިޕް ލިބުނުކަމުގެ ލިޔުން ހަވާލުކޮށްދެއްވުމަށް ސްޓެލްކޯގައި ބޭއްވި ޚާއްސަ ރަސްމިއްޔާތުގައި ރައީސް ސޯލިހު ވިދާޅުވީ ގައުމީ ތަރައްގީއާ ގެންގުޅޭ އެންމެ އިސް ސިޔާސަތަކީ މީހުން ބިނާ ކުރުން ކަމަށެވެ. އަދި ރައްޔިތުން އެދޭފަދަ ކުރިއެރުން ހާސިލްކުރުމަށްޓަކައި ފުރަތަމަ ކުރަންޖެހޭ ކަމަކީ ތައުލީމާ ތަޖުރިބާ ލިބިފައިވާ ގާބިލް ޖީލެއް ބިނާ ކުރުން ކަމަށް އެމަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ މީގެ ކުރިން ރައީސްގެ އެވޯޑް ލިބޭ ދަރިވަރުން ކިޔަވަންޖެހެނީ ސަރުކާރުން ކަނޑައަޅާފައި ހުންނަ ދާއިރާތަކުގެ ތެރެއިން ކޮންމެވެސް ދާއިރާއަކަށް ކަމަށާއި، ނަމަވެސް މިހާރު އެއުސޫލު ބަދަލުކޮށްފައިވާ ކަމަށެވެ. މިއަހަރުން ފެށިގެން ރައީސްގެ އެވޯޑް ލިބޭ ދަރިވަރުންނަށް އެކުދިން ބޭނުންވާ ދާއިރާއަކުން ބޭނުން ގައުމެއްގައި ކިޔެވުމުގެ ފުރުސަތު ލިބޭނެކަން ފާހަގަކުރައްވައި ރައީސް ސޯލިހު ވިދާޅުވީ ހައި އެޗީވަރސް ސްކޮލާޝިޕްގެ އުސޫލު ތަކަށް ބަދަލު ގެނެސްފައިވާ ކަމަށެވެ. އަދި ހައި އެޗީވާސް ސްކޮލާޝިޕް ދެމުން އައީ ވަކި ދާއިރާތަކަކުން އަދި ވަރަށް މަދު ގައުމުތަކުން ފާހަގަކުރެއްވިއެވެ.
ރައީސް ސޯލިހު ވިދާޅުވީ ކިޔަވާކުދިންގެ ކަމުގައި ވިޔަސް ގައުމު ބިނާ ކުރުމުގައި އެކުދިންގެ ދައުރު ވަރަށް މުހިންމު ކަމަށާއި، ދަރިވަރުން މަސައްކަތް ކުރަންވީ ގައުމު ބިނާކޮށް އާރާސްތު ކުރުމަށް ކަމަށެވެ.
ރާއްޖޭގައި ތިބެގެން ހިލޭ ފުރަތަމަ ޑިގްރީ ހާސިލްކުރުމުގެ ފުރުސަތު ފަހިކޮށްދީފައިވާކަން ފާހަގަކުރައްވައި ރައީސް ސޯލިހު ވިދާޅުވީ މިސަރުކާރުން ތައުލީމަށް ގިނަ ފުރުސަތުތަކެއް ފަހިކޮށްދީފައިވާ ކަމަށެވެ. އެގޮތުން ސްޓޫޑެންޓް ލޯނުގެ އިންޓްރެސްޓް ތިން އިންސައްތައަށް ކުޑަކޮށް ލޯނު ދައްކަންޖެހޭ މުއްދަތު 25 އިންސައްތައަށް އިތުރުކޮށްފައިވާ ކަމަށެވެ.
މީގެ އިތުރުން ރައީސް ސޯލިހު ވިދާޅުވީ ތައުލީމީ ދާއިރާއަށް މިފަދަ ބަދަލުތައް ސަރުކާރުން ގެންނަނީ ހަމައެކަނި އިންތިޚާބީ ވައުދުތަކެއް ފުއްދަން ނޫން ކަމަށާއި، އަމާޒަކީ ރާއްޖެ ތަރައްގީކުރުން ކަމަށެވެ.
ރައީސް ސޯލިހު ވިދާޅުވީ ދިރިއުޅުމުގެ ތަފާތު މަރުހަލާތަކުގައި ކާމިޔާބާ އުފާވެރިކަން ބައްދަލުކުރާނީ ދިރިއުޅެން ދަސްކޮށްގެން ކަމަށާއި، މިހާރު ވެސް މަސައްކަތް ކުރަންވީ އަނެކުންނަށް އިހުތިރާމްކޮށް އޯގާތެރިވެ އަޅާލާ ލޯބިވުމުގެ ސިފަ ދެމެހެއްޓުމަށް ކަމަށެވެ.
ރައީސް ސޯލިހު ވިދާޅުވީ ތައުލީމީ ކޮންމެ މަރުހަލާއެއްގައި ދަރިވަރުންގެ ކިޔެވި ނަމަވެސް އެންމެ ވަރުގަދަ އަޒުމަކަށްވާންވާނީ އިސްލާމްދީނުގެ ސައްހަ އަގީދާގެ މަތީގަ ސާބިތު ކަމާއެކު ދެމިތިބުން ކަމަށާއި، ދިވެހި ފަސްގަނޑަށް އުފަން ދިވެހި ދަރިންކަން އަބަދު ވެސް ހަނދާނުގަ ބަހައްޓަން ޖެހޭ ކަމަށެވެ. މަތީތައުލީމަކީ ހަމައެކަނި ޔުނިވާސިޓީގައި ކިޔަވާ ކިޔެވުން އެކަނި ނޫންކަން ފާހަގަކުރައްވައި ރައީސް ސޯލިހު ވިދާޅުވީ ދަރިވަރުން އުނގެނެންވީ އުފެއްދުންތެރި އާ ގޮތްތައް އީޖާދު ކުރަން ކަމަށާއި، މަތީތައުލީމު ހާސިލްކުރުމުގެ އެންމެ ބޮޑު ބޭނުމަކީ ކަންކަންކުރާނެ ރަނގަޅު މޮޅު ގޮތްތައް ދެނެގަނެ އެކަމުގެ ހުނަރު ލިބިގަތުން ކަމަށެވެ.
ރައީސް ސޯލިހު ވިދާޅުވީ މަތީތައުލީމު މަރުހަލާގައި ދަރިވަރުން އުނގެނޭ ކޮންމެ އަކުރަކީ ގައުމު ބިނާކުރުމުގައި ކުރެވޭ ވަރަށް އަގުބޮޑު އިންވެސްޓެއްކަން ކަމަށާއި، ސަރުކާރުން ދޭ ސްކޮލާޝިޕްގެ ހަގީގީ މަގުސަދު ހާސިލްވެގެންދާނީ ކުދިންގެ ގާބިލް ހުނަރުވެރި އަދި ގައުމު އާރާސްތުކުރުމުގައި މުހިންމު ރޯލެއް ކުޅޭނެ ބަޔަކަށްވެގެން ކަމަށެވެ.
