ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާއަށް ބިޑްކުރަން ސްޕޭންގެ ރިއާލް މެޑްރިޑުން ތައްޔާރުވެއްޖެއެވެ.
ރިޕޯޓްތައް ބުނާގޮތުން ރިއާލުން ނޭމާ ގަތުމަށް 115 މިލިއަން ޕައުންޑްއަށް ވުރެ ބޮޑު ބިޑެއް ހުށަހެޅުމަށް ދަނީ ތައްޔާރުވަމުންނެވެ. ހަމައެހެންމެ، ބޭލް ނުވަތަ ހަމޭސް ރޮޑްރިގޭޒް ހިލޭ ޓްރާންސްފާއެއްގައި ޕީއެސްޖީއައް ދޫކޮށްލުމަށް ރިއާލުން އޮތީ ތައްޔާރަށެވެ.
ރިއާލުން ނޭމާއައް ފާރަލާއިރު އޭނާގެ ކުރީގެ ކްލަބް ބާސެލޯނާއިންވެސް ދަނީ ނޭމާއައް ފާރަލަމުންނެވެ.
ރިޕޯޓްތައް ބުނާގޮތުން ރިއާލުން ނޭމާއަށް މަހަކު 30 މިލިއަން ޕައުންޑްގެ މުސާރައެއް ދޭން އޮތީ ތައްޔާރަށެވެ. ނަމަވެސް ނޭމާ ބޭނުން ވަނީ ބާސެލޯނާއަށް ބަދަލުވެ، އަލުން މެސީއާއި އެކު ކުޅުމަށެވެ.
ބާސެލޯނާއިން ނޭމާ ވިދާލިއިރު، އެއީ އޭރު އޮތް އެންމެ ވަރުގަދަ އެޓޭކްލައިން ކަމަށް ގިނަބަޔަކު ގަބޫލުލުރެއެވެ.
ދުނިޔޭގެ އެންމެ އަގުބޮޑު ޓްރާންސްފާރ ފީގައި ނޭމާ ޕީއެސްޖީ އަށް ބަދަލުވިއިރު އޭނާގެ ޓްރާންސްފާރ ފީއަކީ 220 މިލިއަން ޕައުންޑެވެ. ނޭމާ އަށް ރިއާލުން ބިޑް ކުރާއިރު އޭނާގެ ކުރިމަގާއި މެދު ވަނީ ސުވާލު އުފެދިފައެވެ. އެގޮތުން އޭނާ ވިއްކާލާނެ ކަމުގެ އިޝާރާތެއް ޕީއެސްޖީއިން ވަނީ ކޮށްފައެވެ.
