މިހާތަނަށް ހަތް އަތޮޅެއްގަ ރިޒޯޓާއި، ގެސްޓްހައުސްގެ އިންސްޕެކްޝަން ވާނީ ފުރިހަމަ ކޮށްފަ: އަލީ ވަހީދު

މިހާތަނަށް ހަތް އަތޮޅެއްގަ ރިޒޯޓާއި, ގެސްޓްހައުސްގެ އިންސްޕެކްޝަން ފުރިހަމަ ކޮށްފައި ވާނެ ކަމަށް ޓޫރިޒަމް މިނިސްޓްރީއިން ބުނެފިއެވެ.

ޓޫރިޒަމް މިނިސްޓްރީގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މިނިސްޓަރު އަލީ ވަހީދު ވިދާޅުވީ، ޓޫރިޒަމް މިނިސްޓްރީގައި ރަޖިސްޓްރީ ކުރެވިފައިވާ ފަތުރުވެރިންނަށް ހިދުމަތްދޭ ތަންތަނުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ކަނޑައަޅުއްވާފައިވާ ސިޔާސަތުގެދަށުން، މިހާތަނަށް ހަތް އަތޮޅެއްގެ ހުރިހާ ރިޒޯޓު، ހޮޓާ، ގެސްޓްހައުސް، ޑައިވް ސެންޓަރު އަދި މެރީނާތަކުގެ އިންސްޕެކްޝަން ވަނީ ފުރިހަމަ ކޮށްފައި ކަމަށެވެ.

މި އިންސްޕެކްޝަން ކުރިއަށް ގެންގޮސްފައިވަނީ، މޯލްޑިވްސް ޕޮލިސް ސާވިސް އަދި އެމްއެންޑީއެފުގެ ވެސް ބައިވެރިވުމާއެކު ކަމަށް މިނިސްޓަރު ވިދާޅުވިއެވެ. މި އިންސްޕެކްޝަން ކުރިއަށް ދިޔައީ ފެބްރުއަރީ މަހުން ފެށިގެންނެވެ.

އިންސްޕެކްޓު ކޮށްފައިވާ ސަރަހައްދުތަކަކީ ހދ، ގދ، ގއ، އައްޑޫ ސިޓީ، ފުވައްމުލައް ސިޓީގެ އިތުރުން ފ އަތޮޅެވެ. އަދި ވ އަތޮޅާއި ކ އަތޮޅުގެ އިންސްޕެކްޝަންތައްވެސް ދަނީ ކުރެވެމުން ކަމަށް މިނިސްޓަރު ފާހަގަކުރެއްވިއެވެ. މީގެ އިތުރުން މިނިސްޓަރު ފާހަގަ ކުރެއްވީ، މި އިންސްޕެކްޝަންތަކުން ބައެއް ތަންތަނުގެ މައްސަލަތައް ފެނިފައިވާ ކަމަށެވެ.

މިފަދަ އިންސްޕެކްޝަންތަކުގައި ރިޒޯޓު މުވައްޒަފުންގެ ރޭޝިއޯއާއި ވަކިން ހާއްސަކޮށް ސަރވިސް ޗާޖުގެ ކަންކަން ބެލުމަށް އަހައްމިއްޔަތުކަން ދެވޭނެ ކަމަށް ވެސް މިނިސްޓަރު ވިދާޅުވިއެވެ.