ބައިނަލްއަޤްވާމީ މުޖުތަމަޢުގައި ވެސް ރާއްޖެއިން ވަކާލާތުކުރަނީ، ޤާނޫނުގެ ބާރު ނަގަހައްޓައި، އިންސާފު ދަމަހައްޓަން: ރައީސް ސޯލިހް
19 ޖޫން 2019 | ބުދަ 06:40ބޭރު ގައުމުތަކަށްދާ ދިވެހިންގެ ދަތިތައް ޙައްލުކޮށްދިނުމަކީ، އެމްބަސީތަކުގެ އެންމެ މުހިންމު މަސައްކަތް
ސަފީރުންގެ ބައްދަލުވުން ފެށުމުގެ ރަސްމިއްޔާތުގައި ރައީސް ވާހަކަފުޅު ދައްކަަވަނީ
ބައިނަލްއަޤްވާމީ މުޖުތަމަޢުގައި ވެސް ރާއްޖެއިން ވަކާލާތުކުރަނީ، ޤާނޫނުގެ ބާރު ނަގަހައްޓައި، ހަމަޔާއި އިންސާފު ދަމަހައްޓަން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ދިވެހި ސަފީރުންގެ ބައްދަލުވުން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ ރާއްޖެއަކީ ނިސްބަތުން ކުޑަ ޤައުމެއް ނަމަވެސް، ސާބިތުކަމާއެކު ގޮންޖެހުންތަކާ ކުރިމަތިލާ، ޢަޒުމް ވަރުގަދަ ޤައުމެއް ކަމަށެވެ. ޤައުމީ ފެންވަރުގަޔާއި ބައިނަލްއަޤްވާމީ މުޖުތަމަޢުގައި ވެސް ރާއްޖެއިން ވަކާލާތުކުރަނީ، ޤާނޫނުގެ ބާރު ނަގަހައްޓައި، ހަމަޔާއި އިންސާފު ދަމަހައްޓަން ކަމަށާއި ދިވެހިރާއްޖޭގެ ޑިޕްލޮމަސީގެ އަސާސްތަކަކީ ވެސް އެއީ ކަމަށެވެ.
ރައީސް ސޯލިހް ވިދާޅުވީ ސަފީރުންގެ އެންމެ އިސް މަސްއޫލިއްޔަތަކީ ދިވެހި ގައުމާއި ރައްޔިތުންގެ މަސްލަހަތު ހިމާޔަތް ކުރުން ކަމަށެވެ.
ސަފީރުން ތިއްބަވާ ޤައުމުތަކުގައި ދިރިއުޅޭ ދިވެހީންނާއި، އެކި ބޭނުންތަކުގައި ޒިޔާރަތްކުރާ ދިވެހިންނަށް ދިމާވާ ދަތިތައް ޙައްލުކޮށްދިނުމަކީ، ދިވެހި އެމްބަސީތަކުގެ އެންމެ މުހިންމު މަސައްކަތް ކަމުގައި ރައީސް ފާހަގަ ކުރެއްވިއެވެ.
ރައީސް ވިދާޅުވީ ބައިނަލްއަޤްވާމީ މުޖުތަމަޢުގައި ދިވެހި ޤައުމުގެ ހައިބަތު އުފުލައިދެނީ، މި ހަރުދަނާ ޑިޕްލޮމަސީ ކަމަށާއި ޚާރިޖީ ސިޔާސަތުގެ ހަރުދަނާކަމަކީ މި ޤައުމުގެ ދިފާޢު ކަމަށް ގަބޫލުކުރައްވާ ކަމަށެވެ. ސަފީރުންނަކީ، ޑިޕްލޮމަސީ ހިންގަވަން ތިއްބެވި ފަހުލަވާނުން ކަމަށާއި ޚާރިޖީ ގުޅުންތައް އިތުރަށް ހަރުދަނާކޮށް، ހީނަރުވެފައިވާ ގުޅުންތައް އަލުން ބަދަހިކުރުމުގައި، ސަފީރުންގެ ދައުރު ވަރަށް މުހިންމު ކަމަށެވެ.
ރައީސް ސޯލިހް ވިދާޅުވީ ރާއްޖެއިން ބޭރުގައި ދިރިއުޅޭ ދިވެހީންނަށް، ޚާއްޞަކޮށް، ދިވެހި ކިޔަވާކުދިންނަށް ދޭންޖެހޭ ކޮންސިއުލަރ ޚިދުމަތްތައް ފަސޭހަކޮށްދިނުމާ އެކު، އިތުރަށް ފުޅާކޮށް ހަރުދަނާ ކުރުމަކީ، ސަރުކާރުން ވަރަށް ބޮޑަށް އިސްކަންދޭ ކަމެއް ކަމަށާއި މިކަމުގައި އެންމެ މުހިންމު ދައުރެއް އަދާކުރެއްވޭނީ ސަފީރުންނަށް ކަމަށެވެ.
ރާއްޖޭގެ ޚާރިޖީ ސިޔާސަތުގެ އެންމެ އިސް އަމާޒަކީ، ރާއްޖޭގެ ސިޔާދަތީ މިނިވަންކަން ޙިމާޔަތްކޮށް، ޤައުމުގެ ސަލާމަތާއި ރައްކާތެރިކަން ކަށަވަރުކުރުން ކަމަށް ވެސް ރައީސް ވިދާޅުވިއެވެ. އެހެން ޤައުމުތަކާ އެކު ގުޅުން އުފައްދައި ދަމަހައްޓާނީ، ރާއްޖޭގެ މިނިވަންކަމާއި އަމިއްލަވަންތަކަމަށް، ކިތަންމެ ކުޑަ ނަމަވެސް އުނިކަމެއް ނާންނާނެ ގޮތުގެ މަތިން ކަމަށް ވެސް ރައީސް ވިދާޅުވިއެވެ.
ދިވެހިންގެ އިންސާނީ ޙައްޤުތައް ޙިމާޔަތްކުރުމާ އެކު، ފުރިހަމަ ޑިމޮކްރެޓިކް ނިޒާމެއް ޤާއިމުކޮށް، އިޤްތިޞާދީ ގޮތުން ފުދުންތެރި ބަޔަކަށްވުމަކީ، ރާއްޖޭގެ ޚާރިޖީ ސިޔާސަތުގެ މައިގަނޑު އަސާސް ކަމަށާއި ބައިނަލްއަޤްވާމީ މަސްރަޙުގައި ސާބިތުކަމާ އެކު އިސްއުފުލައި، ޢަދުލުވެރިކަމާއި ހަމަޔާއި އިންސާފަށް އަޑުއުފުލުމަކީ، ރާއްޖޭގެ ޚާރިޖީ ސިޔާސަތުގެ އެންމެ މުހިންމު ރުކުން ކަމަށް ވެސް ރައީސް ވިދާޅުވިއެވެ.
ދިވެހި ޚާރިޖިއްޔާގެ މަސައްކަތަކީ ވެސް ޖަޒީރާ ރާއްޖޭގެ މެނިފެސްޓޯ ފުރިހަމަކުރާނެ ގޮތްތަކެއް ހޯދުން ކަމަށާއި ބޭރުގެ ޤައުމުތަކާ އެކު މުޢާމަލާތުކޮށް، ދިވެހިރާއްޖޭގެ ތަރައްޤީގައި ބައިވެރިވެ، އެހީވެދޭނެ ފަރާތްތަކެއް ހޯދުން ކަމަށް ވާއިރު، އެކަމުގައި ޢަމަލީ ގޮތުން، އެންމެ އިސް ދައުރެއް އަދާކުރެވޭނެ އެއްބަޔަކީ، ސަފީރުން ކަމުގައި ރައީސް ސިފަކުރެއްވިއެވެ.
މީގެ އިތުރުން، ރައީސް ވިދާޅުވީ ބޭރު ދުނިޔޭގައި ދިވެހި ދައުލަތް ތަމްސީލު ކުރައްވާ ބޭފުޅުންނަކީ ސަފީރުން ކަމަށެވެ. އަދި ސަފީރުންގެ ބައްދަލުވުމުގެ އެންމެ މައިގަނޑު އެއް މަޤްޞަދަކީ، ޒިންމާތައް އަދާކުރުމުގައި ދިމާވާ ގޮންޖެހުންތައް ދެނެގަނެ، އެކަންކަމަށް ހައްލު ހޯދުމަށް މަޝްވަރާކުރުން ކަމަށް ރައީސް ވިދާޅުވިއެވެ.
