އިންވެސްޓަރުންނަށް ފަހި މާހައުލެއް ގާއިމްކޮށްދޭނަން: މިނިސްޓަރ އަމީރް

ރާއްޖޭގައި އިންވެސްޓްކުރަން އަންނަ ފަރާތްތަކަށް، ގާނޫނަށް ގެންނަން ޖެހޭ ބަދަލުތައް ގެނެސްގެން ވިޔަފާރިކުރަން ފަހި މާހައުލެއް ގާއިމްކޮށްދޭނެ ކަމަށް މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.

ދެ ދުވަހުގެ މުއްދަތަށް ކުރުނބާ ވިލެޖްގައި ކުރިޔަށްދާ މޯލްޑިވްސް ޕާޓްނާޝިޕް ފޯރަމްގައި ވާހަކަފުޅު ދައްކަވަމުން އަމީރު ވިދާޅުވީ، މި ފޯރަމްގެ މައިގަނޑު އަމާޒަކީ ރާއްޖޭގެ ތަރައްގީގެ ބައިވެރިންނާއި އެކު ހީނަރުވެފައި އޮތް ގުޅުން އަލުން ބަދަހިކުރުން ކަމަށެވެ. އަމީރު ވިދާޅުވީ ރާއްޖެއިން ހޯދާފައިވާ ކާމިޔާބީތަކުގެ ފަހަތުގައި ވަނީ އެ ބައިވެރިންތައް ކަމަށެވެ. މި ސަރުކާރުން ބޭނުންވާ ލަނޑުދަނޑިތައް ހާސިލްކުރެވޭނީ އަމިއްލަ ފަރުދުންނާއި ބޭރުގެ ބައިވެރިންގެ އެހީތެރިކަމާއި އެކުކަމަށް ވެސް އަމީރު ވިދާޅުވިއެވެ.

އަމީރު ވިދާޅުވީ ފޯރަމް ނިމިގެންދާ އިރު އިންވެސްޓް ކުރަން ބޭނުންވާ ފަރާތްތަކަށް ސަރުކާރުން ކުރިޔަށް ގެންދަން ބޭނުންވާ މަޝްރޫއުތަކާއި ބެހޭ މައުލޫމާތާއި ހާސިލްކުރަން ބޭނުންވާ ލަނޑުދަނޑިތައް އެނގިގެން ދާނެ ކަމަށެވެ.

ރާއްޖެއިން ކުޑަ ދުވަސްކޮޅެއްގެ ތެރޭގައި ތަރައްގީގެ ގިނަ ލަނޑުދަނޑިތަކަށް ވާސިލްވެވުނު ނަމަވެސް، އެހެން ކުރިއަރަމުން އަންނަ ގައުމުތަކެކޭ އެއް ފަދައިން، ހަމަހަމަކަމާއި އެކީ ރައްޔިތުންނަށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމުގައި ދަތިތަކެއް އެބަހުރި ކަމަށް ވެސް އަމީރު ވިދާޅުވިއެވެ. ރާއްޖެއަކީ ކަނޑުތަކުން ވަކިވެފައިވާ ޖަޒީރާ ގައުމަކަށް ވުމުން، މި މައްސަލަ އެހެން ގައުމުތަކަށް ވުރެ ބޮޑުކަމަށް ވެސް އަމީރު ވިދާޅުވިއެވެ. އޭނާ ވިދާޅުވީ މި ސަރުކާރުން ތަރައްގީ ގެންނަން ބޭނުންވަނީ މި ހަގީގަތް ހިތުގެ އަޑިން ގަބޫލުކޮށްގެން، ރާއްޖޭގެ ގުދުރަތީ ވަސީލަތްތައް ރައްކާތެރިކޮށްގެން ކަމަށެވެ.

އަމީރު ވިދާޅުވީ މި ސަރުކާރުން ކަންކަން ކުރާނީ ދުރާލާ ތައްޔާރުވެގެން ކަމަށާއި، މިނިސްޓްރީ އޮފް ޕްލޭނިން އެންޑް އިންފްރާސްޓްރަކްޗަރއަކީ އޭގެ އަލިގަދަ ހެއްކެއް ކަމަށެވެ. އަދި ވަރަށް އަވަހަށް އެ ވުޒާރާއިން ގައުމީ ޑިވެލޮޕްމަންޓްގެ ޕްލޭނެއް އެކުލަވާލާނެ ކަމަށާއި، މި ރާއްޖެ ދުވަހަކުވެސް ނުދެކޭހާ ތަރައްގީ ގެނެސްދެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަމީރު ވިދާޅުވީ ތަރައްގީ ގެންނާނީ ރައީސް ސޯލިހު ވެވަޑައިގެންނެވި ވައުދުފުޅުތަކާއި އެއްގޮތަށް ކަމަށެވެ.

މޯލްޑިވްސް ޕާޓްނާޝިޕް ފޯރަމްގައި މި އަހަރު 32 ގައުމަކުން 150އަށް ވުރެ ގިނަ މަންދޫބުން ބައިވެރިވެވަޑައިގަންނަވައެވެ. މި ފޯރަމްގެ ޕެނަލްތަކުގައި ކެބިނެޓުގެ ވަޒީރުން އެ ވުޒާރާއެއްގެ މެންޑޭޓުގައި ހިމެނޭ ކަންކަމާއި ގުޅޭ ސެޝަންތަކުގައި ބައިވެރިވެވަޑައިގަންނަވާނެއެވެ.