ޓިވެޓުން އިސްނަގައިގެން "ހުނަރުވެނި 2019" ނަމުގައި ހުނަރު ދައްކައިދޭ ޝޯއެއް ބާއްވަނީ
17 ޖޫން 2019 | ހޯމަ 06:31ޖޫން މަހުގެ 23 އާއި 24 ވަނަ ދުވަހު 14:00 އިން 18:00 އަށް ސުކޫލު ކުދިންނަށް ހުޅުވާލާނެ
ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރެއިނިނގް އޮތޯރިޓީ
ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރެއިނިނގް އޮތޯރިޓީ (ޓިވެޓް އޮތޯރިޓީ) އިން އިސްނަގައިގެން "ހުނަރުވެނި 2019" ނަމުގައި ފަންނީ މަސައްކަތްތަކާއި ހުނަރު ދައްކައިދޭ ޝޯއެއް ބޭއްވުމަށް ނިންމައިފިއެވެ.
ޖޫން މަހުގެ 23 އަދި 24 ގައި ދަރުބާރުގޭގައި ބޭއްވުމަށް ހަމަޖެހިފައިވާ މި ޝޯއަކީ ސަރުކާރާއި އަމިއްލަ ފަރާތްތަކާ ގުޅިގެން އެ އޮތޯރިޓީން ހިންގާ ޝޯއެކެވެ. އަދި މި ޝޯގެ ހަރަކާތްތަކުގައި ސުކޫލުތަކުގެ ދަރިވަރުންނާއި، ޒުވާނުންނާއި ހުރިހާ އުމުރެއްގެ ދިވެހީންނަށް ބައިވެރިވެވޭނެ ކަމަށާއި، މި ޝޯގެ މަޤްސަދަކީ އެ ފަރާތްތަކުގެ މެދުގައި މަސައްކަތްތެރި ކަމުގެ ދާއިރާގެ ޝައުޤުވެރިކަން އުފެއްދުން ކަމަށް ޓިވެޓް އޮތޯރިޓީން ނެރުނު ނޫސްބަޔާނެއްގައި ބުނެފައި ވެއެވެ.
"ހުނަރުވެނި 2019" މެދުވެރިކޮށް ދިވެހީންގެ ތެރޭގައި ޒަމާނުއްސުރެ ކުރަމުން އަންނަ މަސައްކަތްތަކާއި، އުވިގެން ދިއުމުހެ ބިރު ހީވެފައިވާ އެކި ފަންނުތަކާއި، އަލަށް ތައާރަފްވާ މަސައްކަތްތަކާއި ހުނަރުތައް ދައްކާލުމަށް ފުރުސަތު ހުޅުވާލާފައިވާއިރު، ފަސް ދާއިރާއަކަށް މަސައްކަތްތައް ވަނީ ބަހާލެވިފައެވެ. އެގޮތުން އިޖުތިިމާއީ ދާއިރާ، ފަތުރުވެރިކަމުގެ ދާއިރާ، ދަތުރުފަތުރުގެ ދާއިރާ، މަސްވެރިކަމާއި ދަނޑުވެރިކަމުގެ ދާއިރާ، އަދި އިމާރަތް ކުރުމުގެ ދާއިރާއިން ވަނީ މަސައްކަތްތައް ބަހާލެވިފައެވެ.
ޖޫން މަހުގެ 23 އާއި 24 ވަނަ ދުވަހު 14:00 އިން 18:00 އަށް ހުނަރުވެނި ސުކޫލު ކުދިންނަށް ހުޅުވާލާއިރު، 20:00 އިން 22:00 އަށް އާންމުންނަށް ހުޅުވާލާފައި ހުންނާނެ ކަމަށާއި، މިއީ ވަޒީފާ ހޯދާ ފަރާތްތަކާއި މަސައްކަތްތައް ދަސްކުރާ ފަރާތްތަކަށް މުހިއްމު ފުރުސަތަކަށް ވާނެ ކަމަށް އެ އޮތޯރިޓީން ބުނެއެވެ.
