ހަތަރު ޤައުމެއްގެ އާ ސަފީރުން ސަފީރުކަމުގެ ފަތްކޮޅު ރައީސުލްޖުމްހޫރިއްޔާއަށް އަރުވައިފި
16 ޖޫން 2019 | އާދީއްތަ 10:18ސަފީރުން ވަނީ ވަކިވަކިން ރައީސް ސޯލިހާއި ބައްދަލުކުރައްވާފަ
ނިއުޒިލޭންޑް ސަރުކާރުން ކަނޑައެޅުއްވި އާ ސަފީރު ހަރ އެކްސެލެންސީ މިޒް ޖޮއާން ޓިންޑޯލް
ހަތަރު ޤައުމެއްގެ އާ ސަފީރުން ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް އަރުވައިފިއެވެ.
އާދިއްތަ ދުވަހު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައި ނިއުޒިލެންޑާއި، އޮސްޓްރޭލިއާއާއި، މޯލްޓާއާއި، ބަހްރެއިން ސަރުކާރުން ރާއްޖެއަށް ކަނޑައެޅުއްވި އާ ސަފީރުން އެބޭފުޅުންގެ ސަފީރުކަމުގެ ފަތްކޮޅު ރައީސަށް އަރުވާފައިވާއިރު، އެ ޤައުމުތަކަށް ރާއްޖެއަށް ކަނޑައަޅުއްވާފައިވާ ސަފީރުން ވަނީ ވަކިވަކިން ރައީސް ސޯލިހާއި ބައްދަލުކުރައްވާފައެވެ.
މި ހަތަރު ޤައުމުގެ ސަފީރުން ރައީސުލްޖުމްހޫރިއްޔާއާއި ބައްދަލުކުރައްވައި އެޤައުމުތަކާއި ރާއްޖެއާއި ދެމެދު އޮންނަ ގުޅުމުގެ މައްޗަށް ވާހަކަދައްކަވާފައިވާއިރު، އެބޭފުޅުން ވަނީ ރައްޔިތުންނަށް ފައިދާވާ ކަންކަމުގައި ރާއްޖެއާއި އެ ޤައުމުތަކާއި ދެމެދު އޮންނަ ގުޅުން އިތުރަށް ބަދަހިކުރެއްވުމަށް ޝައުޤުވެރިވާކަން ހާމަ ކުރައްވާފައެވެ.
ނިއުޒިލޭންޑް ސަރުކާރުން ދިވެހިރާއްޖެއަށް ކަނޑައެޅުއްވި އާ ސަފީރަކީ ހަރ އެކްސެލެންސީ މިޒް ޖޮއާން ޓިންޑޯލްއެވެ. އަދި އޮސްޓްރޭލިއާ ސަރުކާރުން ހިޒް އެކްސެލެންސީ މިސްޓަރ ޑޭވިޑް ޖޮން ހޮލީ ކަނޑައަޅުއްވާފައިވާއިރު، މޯލްޓާ ސަރުކާރުން ދިވެހިރާއްޖެއަށް ކަނޑައެޅުއްވި އާ ސަފީރަކީ ހިޒް އެކްސެލެންސީ މިސްޓަރ ސްޓެފަން ބޯރގްއެވެ. އަދި ބަހްރެއިން ސަރުކާރުން ދިވެހިރާއްޖޭއަށް ކަނޑައެޅުއްވި އާ ސަފީރަކީ ހިޒް އެކްސެލެންސީ ޢަބްދުއްރަޙްމާން މުޙައްމަދު އަލް ޤަޢުދުއެވެ.
އާ ސަފީރުންނާ ބައްދަލުކުރައްވައި ރައީސް ސޯލިހު އެބޭފުޅުންގެ މަސްޢޫލިއްޔަތާއިގެން ކުރިއަށް ވަޑައިގެންނެވުމުގައި ކާމިޔާބަށް އެދިވަޑައިގެންފައިވާއިރު، މި މަހު 17 އިން 18 އަށް ކުރުނބާ މޯލްޑިވްސްގައި ބޭއްވުމަށް ހަމަޖެހިފައިވާ "މޯލްޑިވްސް ޕާޓްނަރޝިޕް ފޯރަމް 2019" ގައި އެ ޤައުމުތަކުން ބައިވެރިވެފައިވާތީ އެކަމަށްޓަކައި އެމަނިކުފާނު ވަނީ ޝުކުރު އަދާކުރައްވާފައެވެ.
