މަތީ ތައުލީމާ ބެހޭ ގާނޫނެއް އެކުލަވާލަނީ
16 ޖޫން 2019 | އާދީއްތަ 02:59ހަޔަރ އެޑިއުކޭޝަންގެ ކޮލިޓީ ރަނގަޅުކުރަން އިސްކަމެއްދެއްވާ ކަމަށް ވިދާޅުވި
ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން
ދިވެހިރާއްޖޭގައި ދެވޭ މަތީ ތައުލީމު އިތުރަށް ހަރުދަނާ ކުރުމުގެ މަގްސަދުގައި މަތީ ތައުލީމާ ބެހޭ ގާނޫނެއް އެކުލަވައިލުމުގެ މަސައްކަތް ކުރަމުން އަންނަ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހީމް ހަސަން ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުހީ" ޕްރޮގްރާމްގައި ހަޔަރ އެޑިއުކޭޝަން މިނިސްޓަރު ޑރ. ހަސަން ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ވައުދުތަކުގެ ތެރެއިން އެ މިނިސްޓްރީއާ ހަވާލުކުރި ވައުދުތައް ނިމުމާ އެކު މިހާރު އެ މިނިސްޓްރީން އަމާޒު ހިފާފައި ވަނީ ހަޔަރ އެޑިއުކޭޝަން މިނިސްޓްރީގެ އެކްޝަން ޕްލޭންގައި ހުރި ކަންތައްތައް ފުރިހަމަ ކުރުމުގެ މަސައްކަތަށް ކަމަށެވެ.
އޭގެ އިތުރުން ރާއްޖޭގެ މަތީ ތައުލީމު ކަންތައްތައް ފުރިހަމަ ކުރުމަށްޓަކައި އިތުރު މަސައްކަތްތަކެއް ކުރަމުންދާ ކަން މިނިސްޓަރު ފާހަގަ ކުރެއްވިއެވެ. އޭގެ ތެރެއިން އެންމެ އިސްކަމެއް ދެއްވަނީ ހަޔަރ އެޑިއުކޭޝަންގެ ކޮލިޓީ ރަނގަޅުކުރުން ކަމަށާއި، މުސްތަގުބަލުގައި އެއާ ގުޅުން ހުރި ކަންތައްތައް ފެނިގެން ދާނެ ކަމަށް ވިދާޅުވިއެވެ.
އެ މިނިސްޓްރީން ކުރަން ނިންމާފައިވާ ކަންކަމުގެ ތެރޭގައި ރާއްޖޭގައި މަތީ ތައުލީމު ފޯރުކޮށްދޭ ފަރާތްތަކަށް ގަވަރނެންސްގެ ދާއިރާއިން އެކި ކަހަލަ ޓްރެއިނިންގެ ފުރުސަތުތައް ދިނުމާއި، ރާއްޖޭގައި މަތީ ތައުލީމަށް ކިޔަވާ ކުދިންނަށް އޮންލައިން ލައިބްރަރީ ސަރވިސްގެ ހިދުމަތް ފޯރުކޮށްދިނުމުގެ އިތުރުން މަތީ ތައުލީމަށް ކިޔަވާ ދަރިވަރުންނަށް އެކި ކަހަލަ ޓްރެއިނިންގ ދިނުން ހިމެނެއެވެ. އަދި އޭގެ އިތުރުން ނެޝަނަލް ރިސަރޗް ކައުންސިލެއް ގާއިމް ކުރުން ވެސް ހިމެނޭ ކަމަށް މިނިސްޓަރު ވިދާޅުވިއެވެ.
ޑރ. ހަސަން ވިދާޅުވީ، އެ މިނިސްޓްރީއާ ހަވާލުކޮށްފައިވާ ޖޫނިއަރ ކޮލެޖް ހެދުމުގެ މަސައްކަތަކީ ވެސް މިހާރު އިސްކަމެއް ދީގެން މިނިސްޓްރީން ކުރަމުން އަންނަ ކަމެއް ކަމަށެވެ. ޖޫނިއަރ ކޮލެޖަކީ، ސެކަންޑަރީ ނިންމާ ދަރިވަރުންނަށް ބޭނުންވާ ތައުލީމާއި ތަމްރީނު ހުނަރު އެހެން ގޮތަކަށް ފޯރުކޮށްދީގެން އެ ދަރިވަރުންނަށް ވަޒީފާގެ ފުރުސަތު ފޯރުކޯށްދިނުމަށްޓަކައި އުފައްދަން ގަސްތުކުރާ އިންސްޓިޓިއުޝަނެކެވެ.
