އެމްޑީޕީގެ ވަފުދުގެ ޝަރަފުގައި ސްރީލަންކާގެ ބޮޑު ވަޒީރު ރޭގަނޑުގެ ފަރިއްކޮޅެއް ދެއްވައިފި

މަޖިލީހުގެ ރައީސް މުހައްމަދު ނަޝީދާއި، އެ މަނިކުފާނާއި އެކުގައި ސްރީލަންކާއަށް ވަޑައިގެންނެވި ވަފުދުގެ ޝަރަފުގައި ސްރީލަންކާގެ ބޮޑުވަޒީރު ރަނިލް ވިކްރަމަސިންހަ ރޭގަނޑުގެ ފަރިއްކޮޅެއް ދެއްވައިފިއެވެ.

މި ފަރިއްކޮޅު އޮތީ ބޮޑުވަޒީރުގެ ރަސްމީ ގެކޮޅު "ޓެމްޕަލް ޓްރީ" ގައެވެ.

ބޮޑުވަޒީރު ދެއްވި ފަރިއްކޮޅުގައި ރައީސް ނަޝީދާއި، ނައިބު ރައީސް ފައިސަލް ނަސީމާއި މަޖިލީހުގެ ނައިބު ރައީސް އީވާ އަބްދުﷲގެ އިތުރުން އެމްޑީޕީ ޕާލަމެންޓްރީ ގްރޫޕް މެމްބަރުންނާއި ގައުމީ މަޖިލީހުގެ މެމްބަރުންނާއި، ރައީސް އޮފީހުގެ ބައެއް މިނިސްޓަރުން ބައިވެރިވެ ވަޑައިގެންނެވިއެވެ.

ބޮޑުވަޒީރު ވަނީ ރައީސް ނަޝީދާ އެކުގައި ލަންކާއަށް ވަޑައިގެންނެވި ވަފްދާ ބައްދަލުކުރައްވާ ސަލާމްކުރައްވާފައެވެ.

ފަރިއްކޮޅު ފެއްޓެވުމުގެ ކުރިން ރައީސް ނަޝީދާއި، ބޮޑުވަޒީރު ރަނިލް ވިކްރަމަސިންހަ، ދެބޭފުޅުން އެކުގައި ވަނީ މަޝްވަރާ ބައްދަލުވުމެއް ބާއްވާފައެވެ.

އެމްޑީޕީގެ ޓީމުގެ މި ދަތުރަކީ އެޕްރީލް 21 ވަނަ ދުވަހު ސްރީލަންކާއަށް ދިން ޓެރަރިސްޓް ހަމަލާ އަށް ފަހު، އެ ގައުމަކީ ރައްކާތެރި ގައުމެއްކަން ދުނިޔެއަށް ހާމަކޮށްދިނުމުގެ ގޮތުން ކުރާ ދަތުރެކެވެ.