ރާއްޖެއިން ބޮޑު ވަފްދެއް ޒިޔާރަތްކުރުމަކީ ލިބުނު ހިތްވަރެއް: ބޮޑުވަޒީރު ރަނިލް
16 ޖޫން 2019 | އާދީއްތަ 02:40ރައީސް ނަޝީދާ އެކުގައި 100 އަށް ވުރެ ގިނަ ބޭފުޅުންގެ ޓީމެއް
ސްރީލަންކާގެ ބޮޑުވަޒީރު ރަނިން ވިކްރަމަސިންހަ އާއި ރައީސް ނަޝީދު
ސްރީ ލަންކާއަކީ އަމާން ތަނެއްކަން މުޅި ދުނިޔެއަށް ދެއްކުމަށްޓަކާ، ރާއްޖެއިން ބޮޑު ވަފްދެއް އެ ގައުމަށް ޒިޔާރަތްކުރުމަކީ ލިބިވަޑައިގެންނެވި ހިތްވަރެއް ކަމަށް ލަންކާގެ ބޮޑުވަޒީރު ރަނިލް ވިކްރަމަސިންހަ ވިދާޅުވެއްޖެއެވެ.
ލަންކާގެ ބޮޑުވަޒީރުގެ ރަސްމީ ގެކޮޅުގައި ރާއްޖެއެމްވީ އަށް ދެއްވި ޚާއްސަ އިންޓަރވިއުއްގައި ބޮޑުވަޒީރު ވިދާޅުވީ، ސްރީލަންކާއަކީ ރައްކާތެރިތަނެއް ކަން ދުނިޔެއަށް ހާމަކޮށްދެއްވުމަށް މަޖިލީހުގެ ރައީސް މުހައްމަދު ނަޝީދާއި މަޖިލީހުގެ މެމްބަރުން ވަޑައިގެންނެވި ކަމީ، ވަރަށް ރަނގަޅު ޚިޔާލުފުޅެއް ކަމަށެވެ.
ބޮޑުވަޒީރު ވިދާޅުވީ ރައީސް ނަޝީދާއި އެކުގައި ރާއްޖެއިން ބޮޑު ވަފްދެއް ސްރީލަންކާއަށް ވަޑައިގެންނެވުމުން، މުޅި ދުނިޔެ އަށް ވެސް ލަންކާއަކީ ރައްކާތެރި ގައުމެއްކަން އެނގިގެން ހިނގައްޖެ ކަމަށެވެ. ސްރީލަންކާ ރައްޔިތުންނާއި، ދިވެހިރާއްޖޭގެ ރައްޔިތުންނަކީ އެއް އާއިލާއެއް ކަމަށް ވެސް ވިދާޅުވިއެވެ.
ރައީސް ނަޝީދާއި، މަޖިލީހުގެ ނައިބު ރައީސް އީވާ އަބްދުﷲ އާއި، ނައިބު ރައީސް ފައިސަލް ނަސީމް އާއި، ކެބިނެޓް ވަޒީރުންނާއި، އެމްޑީޕީގެ ގައުމީ މަޖިލިސް މެމްބަރުންގެ އިތުރުން ޕާލަމެންޓްރީ ގްރޫޕްގެ މެމްބަރުން ހިމެނޭ ގޮތަށް 100 އަށް ވުރެ ގިނަ ބޭފުޅުންގެ ޓީމެއް އަންނަނީ ލަންކާއަށް ތިން ދުވަހުގެ ދަތުރުފުޅެއް ކުރައްވަމުންނެވެ. މި ދަތުރުފުޅަކީ އެޕްރީލް 21 ވަނަ ދުވަހު ލަންކާއަށް ދިން ޓެރަރިސްޓް ހަމަލާ އަށް ފަހު، ލަންކާއަކީ ރައްކާތެރި ތަނެއް ކަން ހާމަކޮށްދިނުމަށް މުޅި ދުނިޔެއަށް މެސެޖެއް ދިނުމުގެ ގޮތުން ކުރައްވާ ދަތުރުފުޅެކެވެ.
ރައީސް ނަޝީދުގެ މި ދަތުރުފުޅުގައި ހިމެނޭ ޓީމުގެ ޝަރަފުގައި ބޮޑުވަޒީރު ރަނިލް ވަނީ ހޮނިހިރު ދުވަހު ރޭގަނޑުގެ ފަރިއްކޮޅެއް ދެއްވާފައެވެ. މި ފަރިއްކޮޅު އޮތީ ބޮޑުވަޒީރު ދިރިއުޅުއްވާ ރަސްމީ ގެކޮޅު "ޓެމްޕަލް ޓްރީ" ގައެވެ.
