އިންޑިއާ ހެލްތް އެކްސްޕޯ ކާމިޔާބު ކަމާއި އެކު ނިންމާލާއިފި
15 ޖޫން 2019 | ހޮނިހިރު 13:54އިންޑިއާގެ ނަން މަޝްހޫރު ހޮސްޕިޓަލުތަކުން ޚާއްސަ ސްޕެޝަލިޓީ ޑޮކްޓަރުން ބައިވެރިވި
އިންޑިއާ ހެލްތް އެކްސްޕޯ
އިންޑިއާ ހެލްތް އެކްސްޕޯ 2019 ކާމިޔާބު ކަމާއިއެކު ނިންމާލާފި އެވެ.
އިވެންޓް މެނޭޖުކުރި އަސަރީ ސާރވިސަސްގެ އިވެންޓް ޑިރެކްޓަރ އައިޝަތު މުއީނާ ރާއްޖެޓީވީ އާއި ވާހަކަދައްކަވަމުން މުއީނާ ވިދާޅުވީ މި އެކްސްޕޯއަކީ އިންޑިއާއިން ލިބެން ހުރި ސިއްހީ ދާއިރާއިން ފާހަގަ ކޮށްލެވޭ ޚިދުމަތްތަށް ރާއްޖެއަށް ތައާރަފްކުރުމުގެ ގޮތުން ބޭއްވިގެން ދިޔަ އެކްސްޕޯއެއް ކަމަށެވެ. އަދި އިންޑިއާގެ ނަން މަޝްހޫރު ހޮސްޕިޓަލުތަކުން ޚާއްސަ ސްޕެޝަލިޓީ ޑޮކްޓަރުން ބައިވެރިވެ ތަފާތު އެކިއެކި ސިއްހީ ދާއިރާ އާއި ގުޅުންހުރި މައުލޫމާތުތައް ފޯރުކޮށްދީފައިވާ ކަމަށް މުއީނާ ވިދާޅުވި އެވެ.
އެގޮތުން ހިތުގެ ބަލިތަކާއި، ދަރިން ނުލިބުމުގެ މައްސަލަތަކުގެ މައުލޫމާތު ވެސް ފޯރުކޮށްދެވިގެން ދިޔަ ކަމަށް މުއީނާ ވިދާޅުވިއެވެ. އަދި އެފަރާތްތަކުގެ ބޭނުމަކީ ރާއްޖޭގެ ސިއްހީ ދާއިރާ އިތުރަށް ކުރިއަރުވާ ތަރަށްގީ ކުރުން ކަމަށްވެސް މުއީނާ ވިދާޅުވިއެވެ.
ޖޫން މަހުގެ 13 ވަނަ ދުވަހުން 15 ވަނަ ދުވަހުގެ ނިޔަލަށް ދަރުބާރު ގޭގައި ކުރިއަށް ދިޔަ އެކްސްޕޯ އަކީ މެޑްހޮޕްސް އިވެންޓް އިންޑިއާގެ ފަރާތުން އިންތިޒާމްކުރި އެކްސްޕޯއެކެވެ. އަދި މިއީ ރާއްޖޭގައި ސިއްހީ ދާއިރާއާ ގުޅޭ އެކްސްޕޯއެއް ބޭއްވި ފުރަތަމަ ފަހަރެވެ.
