ބަލޮޓެލީ ހޯދުމަށް ޕަރމާއިން މަސައްކަތް ކުރަނީ

ފްރާންސްގެ މާސޭއަށް ކުޅެމުން އަންނަ އިޓަލީގެ ފޯވާޑް މާރިއޯ ބަލޮޓެލީ ގެންނަން އިޓަލީގެ ޕަރމާއިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

އިޓަލީގެ ނޫސްތަކުން ބުނީ، ކުރިޔަށް އޮތް ސީޒަނަށް އަމާޒުކޮށް ބަލޮޓެލީ ގެނައުމަކީ ޕަރމާގެ އަމާޒެއް ކަމަށާއި، އެ ކްލަބުން އެކަމަށް މަސައްކަތް ކުރަމުން އަންނަ ކަމަށެވެ.

ދާދި ފަހުން އިޓަލީގެ ނޫހަކަށް މައުލޫމާތު ދެމުން ބަލޮޓެލީ ބުނީ، ކައިރި މުސްތަގުބަލެއްގައި އިޓަލީގެ ކްލަބަކަށް ބަދަލުވާން ނުވިސްނާ ކަމަށާއި، ނަމަވެސް ކެރިޔަރު ނިންމާލަން ބޭނުން ވަނީ އިޓަލީގެ ބްރެޝާގައި ކަމަށެވެ.

މި އަހަރުގެ ޖެނުއަރީ މަހު މާސޭއަށް ބަދަލުވި ބަލޮޓެލީ އެ ކްލަބާ އެކު ހަދާފައިވާ އެއްބަސްވުން ހަމަވާނީ މި ސީޒަނަށްފަހުއެވެ. އޭނާ ވަނީ މިހާތަނަށް އެޓީމަށް ކުޅުނު 12 މެޗުގައި 8 ލަނޑު ކާމިޔާބުކޮށްފައެވެ.

އިންޓަ މިލާން، އޭސީ މިލާން، މެންޗެސްޓާ ސިޓީ އަދި ލިވަޕޫލަށް ވެސް ކުޅެފައިވާ ބަލޮޓެލީ ނީސް އަށް ބަދަލުވީ 2016 ވަނަ އަހަރުގެ އޯގަސްޓް މަހުގައެވެ. އޭނާ ވަނީ އެޓީމަށް ކުޅުނު 76 މެޗުގައި 43 ލަނޑު ކާމިޔާބުކޮށްފައެވެ.

އިންޓަ މިލާނާ އެކު ތިން ލީގުގެ ތަށި ކާމިޔާބުކޮށްފައިވާ ބަލޮޓެލީ ވަނީ އެ ކްލަބާ އެކު ޔުއެފާ ޗެމްޕިއަންސް ލީގު ވެސް ކާމިޔާބުކޮށްފައެވެ. އަދި އޭނާ ވަނީ ސިޓީއާ އެކު ޕްރިމިއާ ލީގު އަދި އެފްއޭ ކަޕް ވެސް ކާމިޔާބުކޮށްފައެވެ.

އިޓަލީއާ އެކު 2012 ވަނަ އަހަރު ޔޫރޯގެ ދެވަނަ ހޯދި ބަލޮޓެލީ ވަނީ ގައުމީ ޓީމަށް ކުޅުނު 36 މެޗުގައި 14 ލަނޑު ކާމިޔާބުކޮށްފައެވެ.

މީގެ އިތުރުން އޭނާ ވަނީ 2010 ވަނަ އަހަރުގެ ގޯލްޑެން ބޯއި އެވޯޑް އަދި 2012 ވަނަ އަހަރުގެ އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.