އައިޖީއެމްއެޗުގައި އަލިފާނުގެ ހާދިސާއެއް ހިނގައިފި
14 ޖޫން 2019 | ހުކުރު 05:56އަލިފާންގަނޑު ކޮންޓްރޯލް ކުރެވިއްޖެ
އައިޖީއެމްއެޗު ބާއިމާރާތުގައި އަލިފާން ރޯވުން
އައިޖީއެމްއެޗުގައި އަލިފާނުގެ ހާދިސާއެއް ހިނގައިގެން އެމްއެންޑީއެފުން ހަރަކާތްތެރިވެއްޖެއެވެ.
ހުކުރު ދުވަހު ހިނގި މި ހާދިސާއާ ގުޅޭގޮތުން އެމްއެންޑީއެފުން ބުނީ، އަލިފާން ރޯވެފައިވަނީ އައިޖީއެމްއެޗުގެ ބާ އިމާރާތުގެ އިންޖީނު ރޫމެއްގައި ހުރި ބެޓެރީއެއްގައި ކަމަށާއި، އެކަމުގެ ރިޕޯރޓް އެމްއެންޑީއެފަށް ލިބިފައިވަނީ ހުކުރު ދުވަހުގެ ހެނދުނު 10:07 ގައި ކަމަށެވެ.
މިހާދިސާގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް ލިބިފައެއް ނުވެއެވެ. ނަމަވެސް އެމަރޖެންސީ ރޫމްގައި އެޑްމިޓް ކޮށްފައި ތިބި ހުރިހާ ބަލި މީހުން ނެރެ، އެހެން ތަންތަނަށް ވަނީ ބަދަލުކޮށްފައެވެ. އަދި މުޅި ހޮސްޕިޓަލުގެ ތެރޭގައި ދުމުގެ އަސަރު ހުރި ކަމަށް އެތަނަށް ދިޔަ ފަރާތްތަކުން މައުލޫމާތުދެއެވެ.
އަލިފާން ރޯވެގެން އުޅޭކަމުގެ ރިޕޯރޓް އެމްއެންޑީއެފަށް ލިބުމާއެކު، އެމްއެންޑީއެފުގެ ފަޔަރ އެންޑް ރެސްކިއު ސާރވިސްއިން ހަރަކާތްތެރިވެފައިވާއިރު، 10:21 ގައި އަލިފާން ކޮންޓްރޯލް ކޮށްފައިވާ ކަމަށާއި، މިހާރު ކުރަމުންދަނީ އިމާރާތުން ދުން ބޭރު ކުރުމުގެ މަސައްކަތް ކަމަށް އެމްއެންޑީއެފުން މައުލޫމާތުދެއެވެ.
މިހާދިސާގައި އެ އިމާރާތަށް ގެއްލުމެއް ލިބިފައިނުވާ ކަމަށް އެމްއެންޑީއެފުން ބުނެފައިވެއެވެ. އަދި މިހާދިސާގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް ލިބިފައެއް ނުވެއެވެ.
