އީޕީއޭ މިނިވަންކޮށް، ތިމާވެށީގެ ސިޔާސަތުތައް ހަރުދަނާކުރާނަން: ރައީސް

އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) މިނިވަން ތަނަކަށް ހަދާ، ތިމާވެއްޓާ ބެހޭ ސިޔާސަތުތައް މިހާރަށް ވުރެ ހަރުދަނާ ކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

"ތާރީޚުގެ ތެރެއިން ތިމާވެށީގެ ވަޒީރުން" ގެ ނަމުގައި ބޭއްވި ބައްދަލުވުމުގައި ރައީސް ވިދާޅުވީ، މި ސަރުކާރުގެ އެންމެ މުހިންމު އަމާޒަކީ ތިމާވެށި ހިމާޔަތް ކުރުން ކަމަށެވެ. ކުރިން ތިމާވެށީގެ ވަޒީރުކަން ކުރެއްވި ގިނަ ވަޒީރުންތަކަކާއި އެކު ބޭއްވި ބައްދަލުވުމުގައި ރައީސް ވިދާޅުވީ މި ސަރުކާރުގެ އެންމެ ބޮޑު އެއް އަމާޒަކީ ތިމާވެށި ހިމާޔަތް ކުރުން ކަމަށެވެ. އެގޮތުން އީޕީއޭއަށް ގާނޫނީ ބާރުވެރިކަން ދިނުމަށް ސަރުކާރުން ވަރަށް އަވަހަށް މަސައްކަތް ފައްޓާނެ ކަމަށް ރައީސް ވިދާޅުވިއެވެ.

މީގެ އިތުރުން ރައީސް ސޯލިހު ވިދާޅުވީ މިނިސްޓްރީތަކުގެ މެދުގައި އޮންނަ ވާދަވެރިކަމުގެ ސަބަބުން ބައެއް ފަހަރު ސިޔާސަތުތައް ތަންފީޒުކުރަން ހުރަސްއެޅޭ ކަމަށެވެ. އެގޮތުން ރައީސް ވިދާޅުވީ ބައެއް މިނިސްޓްރީތަކުން ގޮތް ދޫނުކުރުމުގެ ސަބަބުން ބައެއް މަޝްރޫއުތައް ހުއްޓާލަން ޖެހިފައިވާ ކަމަށެވެ.

ރައީސް ވިދާޅުވީ ރާއްޖެއަކީ ތަރައްގީވަމުން އަންނަ ގައުމަކަށް ވުމުން، ތިމާވެށި ހިމާޔަތްކުރަން އުނދަގޫވެދާނެ ކަމަށެވެ. އެގޮތުން މައްސަލަތައް ފެންމަތިވަނީ ވިޔަފާރިވެރިންނާއި ޑިވެލޮޕަރުން އެއްކޮޅުގައި ތިބެފައި އަނެއް ކޮޅުގައި ތިމާވެށި ހިމާޔަތްކުރަން ބޭނުންވާ ފަރާތްތައް ތިބުމުން ކަމަށް ވިދާޅުވެ އެފަދަ ދަނޑިވަޅުތަކުގައި ނިންމަން ޖެހޭ އުނދަގޫ ނިންމުންތައް ނިންމަން، ހާޒިރުވެ ތިބި މިނިސްޓަރުންގެ ލަފަޔަކަށް ރައީސް އެދިވަޑައިގެންނެވިއެވެ.

ކުރިން ތިމާވެށީގެ ވަޒީރުކަން ކުރެއްވި ބޭފުޅުންނާ އެކު ބޭއްވި ބައްދަލުވުމަކީ މި އަހަރުގެ ތިމާވެށީގެ ދުވަސް ފާހަގަކުރުމުގެ ގޮތުން ބޭއްވި ބައްދަލުވުމެކެވެ. މި އަހަރުގެ ތިމާވެށީގެ ދުވަހުގެ ތީމަކީ "އެއަރ ޕޮލިއުޝަން" އެވެ.