އދ. މަހިބަދޫގައި ފާމަސިސްޓަކަށް ތޫނު އެއްޗަކުން ބިރުދެއްކުމަށް ފަހު ތިން ސިރިންޖު ފޭރިގެންފިއެވެ.

އެކަމާ ގުޅޭ ގޮތުން ފުލުހުންގެ މީޑިއާ އޮފިޝަލު ވިދާޅުވީ، އދ. މަހިބަދޫގެ ފާމަސީއެއްގައި މަސައްކަތްކުރާ ބިދޭސީ ފާމަސިސްޓަކަށް ތޫނު އެއްޗަކުން ބިރުދެއްކުމަށް ފަހު ތިން ސިރިންޖު ނަގައިގެން ގޮސްފައިވާ ކަމުގެ ރިޕޯރޓް ބުދަ ދުވަހުގެރޭ 21:00 ހާއިރު ފުލުހުންނަށް ހުށައަޅާފައިވާ ކަމަށާއި، އެ މައްސަލައާ ގުޅިގެން ތުހުމަތު ކުރެވޭ 36 އަހަރުގެ ފިރިހެނަކު މަގުމަތިން ހުއްޓުވައި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ފުލުހުން އިތުރަށް ބުނީ، މި މައްސަލާގައި ތުހުމަތު ކުރެވޭ މީހާ ފުލުހުންގެ ބެލުމުގެ ދަށަށް ގެނައިރު ހުރީ މަސްތުގެ ހާލަތުގައި ކަމަށެވެ.

މި މައްސަލަ ފުލުހުން ދަނީ ތަހުޤީޤު ކުރަމުންނެވެ.

ފަހަކަށް އައިސް ފޭރުމާއި ވައްކަމުގެ މިފަދަ މައްސަލަތައް އިތުރުވެފައިވާއިރު، މި އަހަރުގެ މިހާތަނަށް ވައްކަމުގެ 1600 އަށްވުރެ ގިނަ މައްސަލައާއި، ފޭރުމުގެ 175 އަށްވުރެ ގިނަ މައްސަލަ ފުލުހުންނަށް ރިޕޯރޓްކޮށްފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.