ލިވަޕޫލްއަށް ކުޅެމުން އަންނަ އެލެކްސް އޮކްސްލެޑް ޗެމްބަލިން އެ ކްލަބާއެކު ހަދާފައިވާ އެއްބަސްވުން އާކުރަން އުޅޭކަމަށް ރިޕޯޓްތައް ބުނެފިއެވެ.

ޑެއިލީ މެއިލްއިން ބުނީ، ލިވަޕޫލްގެ އެއްބަސްވުން ޗެމްބަލިން އާކުރުމާ ގާތަށް ގޮސްފައިވާ ކަމަށާއި، އާ އެއްބަސްވުމުގެ ދަށުން އޭނާއަށް ހަފްތާއަކު 120،000 ޕައުންޑު ލިބޭނެކަމަށެވެ. އަދި އެ އެއްބަސްވުން ހަމަވާނީ 2023 ވަނަ އަހަރުކަމަށްވެސް ޑެއިލީމެއިލްއިން ބުނެއެވެ.

މިދިޔަ ސީޒަނުގައި އަނިޔާގެ މައްސަލަތަކާ ކުރިމަތިލާން ޖެހުނު ޗެމްބަލިންއަށް މިދިޔަ ސީޒަނުގައި ކުޅެވިފައިވަނީ އެންމެ ދެ މެޗެވެ. އަދި އޭނާއަށް ފުރަތަމަ 11 އިން މެޗުތަކުގައި ޖާގަވެސް ލިބިފައެއް ނުވެއެވެ.

އާސެނަލް ދޫކޮށް މި ސީޒަނަށް 35 މިލިއަން ޕައުންޑަށް ލިވަޕޫލް އަށް ބަދަލުވި ޗެމްބަލިން ވަނީ މިހާތަނަށް އެ ޓީމަށް ކުޅުނު 44 މެޗުގައި ފަސް ލަނޑު ކާމިޔާބުކޮށްފައެވެ. އަދި އޭނާ ވަނީ އެޓީމާއެކު ޔުއެފާ ޗެމްޕިއަންސް ލީގު މިދިޔަ ސީޒަނުގައި ކާމިޔާބުކޮށްފައެވެ.

ޗެމްބަލިން އޭނާގެ ކެރިޔަރު ފެށީ 2009 ވަނަ އަހަރު ސައުތްހެމްޕްޓަނުންނެވެ. އޭނާ އެ ކްލަބަށް 43 މެޗު ކުޅެދީ 10 ލަނޑު ކާމިޔާބުކުރުމަށް ފަހު އާސެނަލް އަށް ބަދަލުވީ 2011 ވަނަ އަހަރެވެ.

އެގޮތުން އޭނާ ވަނީ އާސެނަލް އަށް ކުޅުނު 198 މެޗުގައި 20 ލަނޑު ކާމިޔާބުކުރުމުގެ އިތުރުން އެ ޓީމާ އެކު އެފްއޭކަޕް ތިން ފަހަރު އަދި ތިން އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.

ޗެމްބަލިން ވަނީ އިނގިރޭސި ގައުމީ ޓީމަށް ކުޅުނު 32 މެޗުގައި ހަ ލަނޑު ކާމިޔާބުކޮށްފައެވެ.