ފިހާރަތަކުގެ ސެކިއުރިޓީ ވަރުގަދަ ކުރުމަށް ޚާއްސަ މެޝިނެއް ރީޓެއިލް ކުރަނީ

ފިހާރަތަކާއި އެފަދަ ވިޔަފާރިކުރާ ތަންތަނުގެ ސެކިއުރިޓީ ވަރުގަދަ ކުރުމަށް ޚާއްސަ މެޝިނެއް ރީޓެއިލްކޮށް ގެނައުމަށް ފީއެސް ސިސްޓަމް ޕްރައިވެޓް ލިމިޓެޑުން ތައްޔާރުވެއްޖެއެވެ.

ޓައިކޯ ރީޓެއިލް ސޮލިއުޝަންސްއާ ގުޅިގެން އެ ކުންފުނިން ތައާރަފްކުރާ މި ޚިދުމަތާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ފީއެސް ކުންފުނީގެ ފައިނޭންޝިއަލް ކޮންޓްރޯލަރ ނަޒްމީ ހަމީދު ވިދާޅުވީ، މި މެޝިންގެ މަޤްސަދަކީ ފިހާރަތަކުން ވައްކަން ކުރުން ފަދަ ކަންކަން މަދުކޮށް، ވިޔަފާރިތަކުގެ މުދާ ރައްކާތެރި ކުރުމަށް ކަމަށެވެ.

ސެންސޮމެޓިކް ބްރޭންޑުގެ މި މެޝިނާ ގުޅޭގޮތުން ވިޔަފާރިތަކަށް މައުލޫމާތު ދިނުމަށް ބުދަ ދުވަހު ބޭއްވި ބައްދަލުވުމެއްގައި ވާހަކަދައްކަވަމުން ޓައިކޯ ކުންފުނީގެ އޮފިޝަލަކު ވިދާޅުވީ، މެޝިންގެ ސަބަބުން ފިހާރައިން މުދާ ގެއްލުން ހުއްޓުވޭނެ ކަމަަށެވެ.

އެގޮތުން ސެކިއުރިޓީ ފީޗަރއެއްގެ ގޮތުން ފިހާރަތަކުގައި ހުންނަ މުދަލުގައި ޚާއްސަ ޓެގެއް ހަރުކުރެވޭނެ ކަމަށާއި، ޓެގް ޑީއެކްޓިވޭޓް ކުރުމަށް ކޮންމެ ކައުންޓަރެއްގައިވެސް ޑީއެކްޓިވޭޓަރެއް ބެހެއްޓިފައި ހުންނާނެ ކަމަށެވެ. އަދި ކައުންޓަރުން ޓެގް ޑީއެކްޓިވޭޓް ނުކޮށް ނުކުންނަން މަސައްކަތް ކޮށްފިނަމަ މެޝިން އެލާރމްވާނެ ކަމަށް އޭނާ ވިދާޅުވިއެވެ.

ގިނަ ސެކިއުރިޓީ ފީޗަރތަކެއް އެކުލެވޭ މި މެޝިން މެދުވެރިކޮށް ފިހާރައަށް އަންނަ މީހުންގެ އަދަދާއި، ތަފްސީލު ރެކޯރޑް ކުރެވޭއިރު، މިއީ ވައްކަން ފަދަ ކުއްތަށް ގިނަ ޒަމާނެއްގައި ވިޔަފާރިތަކަށް ނުހަނު ބޭނުންތެރި މެޝިނަކަށްވާނެ ކަމަށް ޓައިކޯ ކުންފުނިން ބުނެއެވެ.