ތަޅުންމަތީ ނާސްތާ ދިން ސުކޫލްގެ މައްސަލަ ބަލައި ފިޔަވަޅު އަޅައިފިން، ތަކުރާރެއް ނުވާނެ: އެޑިއުކޭޝަން
11 ޖޫން 2019 | އަންގާރަ 14:08213 ސުކޫލެއްގައި 57817 ދަރިވަރުންނަށް ނާސްތާ ދެވިފައިވޭ
ހެނދުނުގެ ނާސްތާ ޕްރޮގްރާމްގައި ސުކޫލެއްގެ ދަރިވަރުން ނާސްތާ ނަގަނީ
ރާއްޖޭގެ ހުރިހާ ސުކޫލެއްގައި ހެނދުނުގެ ނާސްތާ ދިނުމުގެ ޕްރޮގްރާމް ފެށިއިރު، އެއް ސުކޫލެއްގެ ތަޅުންމަތީގައި ދަރިވަރުންނަށް ނާސްތާ ދިން މައްސަލަ ބަލައި، ފިޔަވަޅު އަޅާފައިވާކަމަށާއި، އެކަން ތަކުރާރުނުވާނެގޮތަށް ފިޔަވަޅު އަޅާފައިވާނެ ކަމަށް އެޑިއުކޭޝަން މިނިސްޓްރީން ބުނެފި އެވެ.
ރާއްޖޭގެ ހުރިހާ ސުކޫލެއްގައި ހެނދުނުގެ ނާސްތާ ދިނުމުގެ ޕްރޮގްރާމް ފެށީ، އަންގާރަ ދުވަހު އެވެ. އެ ޕްރޮގްރާމް ފެށިއިރު، ރަށެއްގެ ސުކޫލްގެ ތަޅުންމަތީގައި ދަރިވަރުން ހެނދުނުގެ ނާސްތާ ނަގަމުންދިޔަ ފޮޓޯއެއް ސޯޝަލް މީޑިއާގައި އާންމުވެ ގިނަ ބައެއް ފާޑުކިޔުންތައް އަމާޒުވެފައިވެއެވެ.
ރާއްޖެ.އެމްވީއަށް އެނގިފައިވާގޮތުގައި އެއީ ތިނަދޫ އަބޫބަކުރު ސުކޫލްގެ އެލްކޭޖީ ދަރިވަރުންތަކެއް ނާސްތާ ނެގުމަށް ތިބި ފޮޓޯއެކެވެ.
އެކަމާއި ގުޅެގޮތުން އެޑިއުކޭޝަން މިނިސްޓްރީން އާންމުކުރި ނޫސްބަޔާނެއްގައި ބުނީ ސުކޫލްތަކުގެ ދަރިވަރުންްނަށް ނާސްތާ ދިނުމުގެ ޕްރޮގްރާމް ކުރިއަށްގެންދިއުމުގައި ދެ ކްލާސްރޫމެއްގައި ދަރިިވަރުންނަށް ނާސްތާދީފައިވަނީ ނާސްތާ ޕްރޮގްރާމްގެ އުސޫލާއި ހިލާފަށްކަމަށް މިނިސްޓްރީއަށް ފާހަގަކުރެވިފައިވާކަމަށެވެ. އަދި 213 ސުކޫލެއްގައި 57817 ދަރިވަރުންނަށް ނާސްތާ ދެވިފައިވާއިރު، މަދު ކްލާސްރޫމްތަކުގައި މިފަދަ އަމަލެއް ހިންގުމުން، މާތް މަޤްސަދެއްގައި ސަރުކާރުން ހިންގާ ޕްރޮގްރާމްތަކަށް ރައްޔިތުންކުރާ އިތުބާރު ގެއްލިގެންދާކަމަށް މިނިސްޓްރީން ބުންޏެވެ.
އެޑިއުކޭޝަނުން ބުނީމަދު މުވައްޒިފުންތަކެއް މިފަދަ އަމަލެއް ހިންގާފައިވާތީ އެކަން މިނިސްޓްރީން ހަރުކަށި އިބާރާތުން ކުށްވެރިކުރާކަމަށެވެ. އަދި އެކަން ކޮށްފައިވާ ފަރާތްތަކާއިމެދު ފިޔަވަޅު އަޅަފައިވާކަމަށް މިނިސްޓްރީން ުންޏެވެ.
ރާއްޖެ.އެމްވީއަށް މައުލޫމާތުދެއްވަމުން އަބޫބަކުރު ސުކޫލްގެ ޕްރިންސިޕަލް ޖަމްޝީދަ ވިދާޅުވީ އެލްކޭޖީގެ ދަރިވަރުންނަކީ މީގެކުރިންވެސް އެގޮތަށް އިންޓަވަލް ނަގާ ކުދިންތަކެއްކަމަށާއި، މީގެކުރިން ބޭނުންކުރީ އިންޓަވަލް ބޮކްސް ކަމަށެވެ. އަދި އަންގާރަ ދުވަހުވެސް ހެނދުނުގެ ނާސްތާ ދިނުމުން އެކުދިން، ނާސްތާއާއިއެކުގައި ގޮސް އެގޮތަށް، ވަށް ބުރަކަށްވާގޮތަށް އިށީނީކަމަށް ޖަމްޝީދާ ވިދާޅުވި އެވެ.
އޭނާ ވިދަޅުވީ އެއީ ގަސްދުގައި ހިނގިކަމެއް ނޫންކަމަށާއި، އަދި އެކަން ފާހަގަކުރެވުމާއެކު، އެފަދަކަމެއް ތަކުރާރުނުވާނެގޮތަށް ފިޔަވަޅު އަޅާފައިވާނެކަމަށެވެ.
ހުރިހާ ސުކޫލެއްގައި ހެނދުނުގެ ނާސްތާ ދިނުމުގެ ޕްރޮގްރާމް ފައްޓަވައިދެއްވީ އަންގާރަ ދުވަހު ނައިބް ރައީސް ފައިސަލް ނަސީމެވެ. ހެނދުނުގެ ނާސްތާ ދިނުމަކީ، ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ.
