އިންޑިއާ އިން ދޭ އެހީއަކީ ކޮންމެ ދިވެހި ރައްޔިތަކަށް ވެސް ފައިދާ ކުރާނެ އެހީއެއް: ބޮޑުވަޒީރު މޯދީ
ރާއްޖެއިން އެހީ ބޭނުންވާ ކޮންމެ ކަމެއްގައި ވެސް އެންމެ ގާތުގައި ވަނީ އިންޑިއާ
އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގެންނެވުން
އިންޑިއާ އިން ރާއްޖެއަށް ދޭ ކޮންމެ އެހީއަކީ އެއިން ކޮންމެ ދިވެހި ރައްޔިތަކަށް ފައިދާ ކުރާނެ އެހީއެއް ކަމަށް އިންޑިއާގެ ބޮޑުވަޒީރު ނަރެންދުރާ މޯދީ ވިދާޅުވެއްޖެއެވެ.
ރާއްޖެއަށް ކުރައްވާ ދެ ދުވަހުގެ ދަތުރުފުޅުގައި ރައީސް އިބްރާހީމް މުހައްމަދު ސޯލިހާ ބައްދަލުކުރެއްވުމަށް ފަހު ދެއްވި ޖޮއިންޓް ޕްރެސްގައި ވާހަކަފުޅު ދައްކަވަމުން ބޮޑުވަޒީރު މޯދީ ވިދާޅުވީ ރާއްޖެއިން އެހީ ބޭނުންވާ ކޮންމެ ކަމެއްގައި ވެސް އެންމެ ގާތުގައި ވަނީ އިންޑިއާ ކަމަށެވެ. އެގޮތުން 1988 ގައި ރާއްޖެއަށް ދިން އުދުވާނީ ހަމަލާ އާއި ސުނާމީ ކާރިސާ އާއި ފެނުގެ ދަތިކަން ކުރިމަތިވެ ރާއްޖެ އެންމެ ބޮޑު އެހީތެރިކަމަކަށް ބޭނުންވެފައި ވަނިކޮށް އެހީތެރިކަން ދިނީ އިންޑިއާ އިން ކަން ފާހަގަ ކުރެއްވިއެވެ.
ބޮޑުވަޒީރު މޯދީ ވިދާޅުވީ ރާއްޖެއަށް ބޭނުންވާ ކޮންމެ އެހީތެރިކަމެއް ފޯރުކޮށްދޭން އިންޑިއާ އޮތީ ތައްޔާރަށް ކަމަށެވެ. އެމަނިކުފާނު ވިދާޅުވީ އިންޑިއާ އާއި ރާއްޖެއާ ދެމެދުގައި އޮންނަ ގާތް ގުޅުމަކީ ސަރަހައްދުގެ ހަމަޖެހުން ގާއިމުކުރިމަށް އޮތް މުހިއްމު ކަމެއް ކަމަށާއި ރާއްޖެއާ އެކު ވަރުގަދަ ގުޅުމެއް ބޭއްވުމަކީ އެ ގައުމުގެ އަމާޒު ކަމަށެވެ.
ރައީސް އިބްރާހިމް މުހައްމަދު ސޯލިހު ހުވާ ކުރެއްވުމުގެ ރަސްމިއްޔާތަށް ވަޑައިގެންނެވުމަށް ފަހު އިންޑިއާ އިން ވަނީ 1.4 ބިލިއަން ޑޮލަރުގެ އެހީ ދެއްވާފައެވެ. އިންޑިއާ އިން ދިން މާލީ އެހީތެރިކަމުގެ ބޭނުމަކީ ދިވެހި ރައްޔިތުންނަށް އެންމެ ފައިދާހުރި މަޝްރޫއުތައް ހިންގުން ކަމަށް ބޮޑުވަޒީރު މޯދީ ވިދާޅުވިއެވެ. އަދި ރާއްޖެއާ ދެމެދު އެއްބަސްވެފައިވާ ކްރެޑިޓް ފެސިލިޓީގެ ސަބަބުން އެތައް މަޝްރޫއެއް ފެށޭނެ ކަމަށް ވިދާޅުވިއެވެ.
ރާއްޖޭގެ ރައްޔިތުން ބޭނުންވަނީ ހަމަޖެހުމާއި ތަރައްގީ ކަމަށް ބޮޑުވަޒީރު މޯދީ ވިދާޅުވިއެވެ. މޯދީ ރާއްޖެއަށް ކުރައްވާ ޒިޔާރާތުގައި އެމަނިކުފާނަށް ވަނީ ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުއްވާފައެވެ. އެ ލަގަބަކީ ރާއްޖޭގައި ބޭރުގެ ގައުމެއްގެ އިސްވެރިޔަކަށް ދެވޭ އެންމެ މަތީ ލަގަބެކެވެ. ބޮޑުވަޒީރު މޯދީ އަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުއްވާފައި ވަނީ ރާއްޖެއަށް ވެދެއްވަމުންގެންދަވާ އެހީގެ އަގު ވަޒަންކޮށް ދެއްވާ ލަގަބުފުޅެއްގެ ގޮތުގައެވެ.
ހިންދީ ބަހުން ވާހަކަފުޅު ދައްކަވަމުން ބޮޑުވަޒީރު މޯދީ ވިދާޅުވީ އެއީ ހަމައެކަނި އަމިއްލަފުޅަށް ލިބިވަޑައިގެންނެވި ޝަރަފެއް ނޫން ކަމަށާއި އެއީ އިންޑިއާގެ ހުރިހާ ރައްޔިތުންނަށް ވެސް ލިބިނު ޝަރަފެއް ކަމަށެވެ. އަދި އެކަމަށް އިންޑިއާގެ ހުރިހާ ރައްޔިތުން ވެސް ފަޚުރުވެރިވާނެ ކަމަށް ވިދާޅުވިއެވެ.
