މޯދީގެ ދަތުރުފުޅުގައި ހަ އެއްބަސްވުމެއްގައި ސޮއި ކުރައްވާނެ
7 ޖޫން 2019 | ހުކުރު 13:37މޯދީއަށް މަރުހަބާ ދެންނެވުމުގެ ހަރަކާތްތައް ކުރިއަށްގެންދިއުމަށް ހަމަޖެހިފައިވަނީ ޖުމްހޫރީ މައިދާނުގައި
ފޮރިން މިނިސްޓްރީގައި ބޭއްވި ނޭޭސްވެރިންގެ ބައްދަލުވުމުގެ ތެރެއިން
އިންޑިއާގެ ބޮޑު ވަޒީރު ނަރެންދުރާ މޯދީ ރާއްޖެއަށް ކުރައްވާ ރަސްމީ ދަތުރުފުޅުގައި ދެ ޤައުމުގެ ދެމެދުގައި ހަ އެއްބަސްވުމެއްގައި ސޮއި ކުރައްވާނެ ކަމަށް ފޮރިންގ މިނިސްޓްރީން ބުނެފިއެވެ.
ދެ ވަނަ ދައުރަކަށް އިންތިހާބުވެވަޑައިގެންނެވުމަށްފަހު ޤައުމުންް ބޭރަށް ކުރައްވާ ފުރަތަމަ ދަތުރުފުޅުގައި މޯދީ ރާއްޖެ ވަޑައިގަތުމަށް ހަމަޖެހިފައިވަނީ ހޮނިހިރު ދުވަހުގެ މެންދުރު ފަހު އެވެ.
މޯދީގެ ދަތުރުފުޅާއި ގުޅޭގޮތުން މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ފޮރިންގ މިނިސްޓްރީގެ ސްޓޭޓް މިނިސްޓަރު އަހުމަދު ހަލީލް ވިދާޅުވީ ދެ ޤައުމުގެ ދެެމެދުގައި ހަ އެއްބަސްވުމެއްގައި ސޮއި ކުރުމަށް ހަމަޖެހިފައިވާއިރު، އެއީ ރާއްޖޭގައި ހިއުމަން ރިސޯސްގެ ވަސީލަތްތައް ތަރައްގީ ކުރުމަށްވެވޭ އެއްބަސްވުންތަކެއް ކަމަށް ހަލީލް ވިދާޅުވި އެވެ.
ސޮއި ކުރުމަށް ހަމަޖެހިފައިވާ އެއްބަސްވުންތަކުގެ ތެރޭގައި ހިމެނެނީ، ސިއްހީ ދާއިރާއިން ވެވޭ އެއްބަސްވުމަކާއި، ސިވިލް ސާވަންޓުންނަށް އަމާޒުކޮށް ބާއްވާ ކެޕޭސިޓީ ބިލްޑިންގ ޕްރޮގްރާމާއި، އިޤްތިސާދީ ދާއިރާއިން ހުނަރު އިތުރު ކުރުމުގެ ޕްރޮގްރާމް އަދި ރާއްޖެއާއި އިންޑިއާގެ ދެމެދުގައި ވައިޓް ޝިޕިންއާ ބެހޭ މައުލޫމާތު ހިއްސާކުރުމުގެ އެއްބަސްވުމުގެ އިތުރުން ހައިޑްރޯގްރަފީ އާއި އިކޮނޮމީއާއި ބެހޭގޮތުން ސޮއިކުރެވޭ އެއްބަސްވުމެއް ކަމަށް ހަލީލް ވިދާޅުވި އެވެ.
ހަލީލް އިތުރަށް ވިދާޅުވީ މޯދީގެ މިދަތުރުފުޅުގައި އިންޑިއާގެ އާ އެމްބަސީގެ ބިންގާ އެޅުމަށް ހަމަޖެހިފައިނުވާކަމަށެވެ. އެއީ މާލެއަށް ދިމާވެފައިވާ ތޮއްޖެހުމުގެ މައްސަލަ ހައްލުކުރުމުގެ ގޮތުން އެހެން ގައުމުތަކުގެ އެމްބަސީތަކަށް ވެސް ހުޅުމާލެއިން ބަދަލުކުރުމަށް ނިންމާފައިވުމުން އެކަމުގެ މަޝްވަރާތައް ކުރިއަށްދާތިކަމަށް ހަލީލް ވިދާޅުވި އެވެ.
އޭގެއިތުރުން އިންޑިއާ އާއި ރާއްޖެއާއި ދެމެދު ފެރީގެ ހިދުމަތް ދިނުމަށް ނިންމާފައިވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައިވެސް މަޝްވަރާތަށް ކުރެވިފައިވާ ގޮތަށް ކަމަށް ހަލީލް ވިދާޅުވިއެވެ.
އިންޑިއާގެ ބޮޑު ވަޒީރު ނަރެންދްރަ މޯދީ ރާއްޖެ ވަޑައިގަންނަވާނީ ހޮނިހިރު ދުވަހުގެ މެންދުރު ފަހުއެވެ. އަދި އެއަށްފަހު މޯދީއަށް މަރުހަބާ ދެންނެވުމުގެ ގޮތުން ހަވީރު 4:00 ގައި ޖުމްހޫރީ މައިދާނުގައި ހަރަކާތްތައް ކުރިއަށްގެންދިއުމަށް ވަނީ ނިންމާފަ އެވެ. އަދި އެއަށްފަހު ދެ ޤައުމުގެ ލީޑަރުގެ ރަސްމީ މަޝްވަރާތަކަށް މޯދީ ވަޑައިގަތުމަށް ހަމަޖެހިފައިވަނީ ރައީސް އޮފީހަށެވެ.
ދެ ޤައުމުގެ ލީޑަރުންގެ ޖޮއިންޓް ޕްރެސް ކޮންފަރެސް ރައީސުލްޖުމްހޫރިއްޔާގެ އޮފީހުގައި ކުރިއަށްގެންދިއުމަށް ހަމަޖެހިފައިވާއިރު، އެ ކޮންފަރެންސްގެ ކުރިން، އިންޑިއާއިން ހަދިޔާކޮށްފައިވާ ރާޑަރު ސިސްޓަމްތަކުގެ އިތުރުން، ޅ. މާފިލާފުށީގައި ގާއިމުކުރި ސިފައިންގެ ކޮމްޕޮސިޓް ޓްރެއިނިންގ ސިސްޓަމް އިފްތިތާހު ކުރައްވާނެކަމަށް ފޮރިންގ މިނިސްޓްރީ ބުނެ އެވެ.
އިންޑިއާގެ ބޮޑު ވަޒީރު، ރައްޔިތުންގެ މަޖިލީހުގައި ތަޤުރީރުކުރެއްވުމަށް ވަޑައިގަންނަވާނީ އެއަށްފަހުގަ އެވެ. ރައްޔިތުންގެ މަޖިލީހުގެ ޖަލްސާ ފެށުމަށް ހަމަޖެހިފައިވަނީ މަޤްރިބް ނަމާދަށްފަހުގަ އެވެ.
ރައްޔިތުންގެ މަޖިލީހުގައި މޯދީގެ ތަގުރީރެއް ދެއްވަން ހަމަޖެހިފައިވާއިރު، ރައްޔިތުންގެ މަޖިލިސް ކުރާ ގޭގައި ތަގްރީރް ކުރެއްވުމުގެ ފުރުސަތު ގައުމުތަކުން އަރުވަނީ، އެ ގައުމަކުން އެ މެހްމާނަކަށް ދެވޭނެ އެންމެ މަތީ ޝަރަފު އެރުވުމުގެ ގޮތުންނެވެ.
މޯދީގެ ދަތުރު ނިންމަވާލައްވަން ހަމަޖެހިފައިވަނީ އާދިއްތަ ދުވަހުއެވެ.
ފޮރިންގ މިނިސްޓްރީން ބުނީ މޯދީގެ މި ދަތުރުފުޅުގައި ރާއްޖޭގެ ބައެއް ސިޔާސީ އިސް ބޭފުޅުންނާއި ބައްދަލުކުރައްވާނެ ކަމަށެވެ. އެގޮތުން، ކުރީގެ ރައީސް މައުމޫން އަބްދުއް ގައްޔޫމާއި، ޖުމްހޫރީ ޕާޓީގެ ލީޑަރު ގާސިމް އިބްރާހީމާއި، އަދާލާތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲގެ އިތުރުން ނައިބު ރައީސް ފައިސް ނަސީމް އާއި ބައްދަލު ކުރައްވާނެކަމަށް މިނިސްޓްރީން ބުންޏެވެ.
