ޕާލިމެންޓަރީ ގްރޫޕުގެ ޑެޕިއުޓީ ލީޑަރު ކަމަށް ކުރިމަތިލުމުގެ ޝައުގުވެރިކަން އެބަހުރި: އީސަ
ރަނގަޅު ހިދުމަތްތެއް ކޮށްދެވޭނެ ކަމަށް ގަބޫލުކުރައްވާ ކަމަށް ވިދާޅުވި
އީސަ މަޖިލީހުގެ ރައީސް ނަޝީދާއެކު
އެމްޑީޕީ ޕާލެމެންޓްރީ ގްރޫޕުގެ ނައިބު ލީޑަރަކަށް ކުރިމަތިލުމުގެ ޝައުގުވެރިކަން އެބަހުރި ކަމަށް ރައްޔިތުންގެ މަޖިލީހުގެ ކެނދިކޮޅަދޫ ދާއިރާގެ މެމްބަރު އަހްމަދު އީސަ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި އީސަ ވިދާޅުވީ، ޕާލިމެންޓްރީ ގްރޫޕުގެ މަގާމުތަކަށް ކުރިމަތިލާން ފުރުސަތު ހުޅުވާލުމުން ނައިބު ލީޑަރަށް ކުރިމަތިލުމުގެ ޝައުގުވެރިކަން އެބަހުރި ކަމަށެވެ.
އެމްޑީޕީގެ އެތެރޭގެ އިންތިހާބު ތަކަކީ ވަރަށް ވާދަވެރި އަދި ޝައުގުވެރި އިންތިހާބުތަކެއް ކަން ފާހަގަކުރައްވަމުން އީސަ ވިދާޅުވި، އެމަގާމަށް ކުރިމަތިލުމަށް ޝައުގުވެރިކަން ގެންގުޅުއްވަނީ ސަބަބު ތަކެއް ހުރެގެން ކަމަށެވެ.
އެ ސަބަބުތައް ބަޔާން ކުރައްވަމުން އޭނާ ވިދާޅުވީ، ސިޔާސީ ހަޔާތް ފެއްޓެވީ އެމްޑީޕީން ކަމަށާއި ހުރިހާ ހިދުމަތެއް ގުޅިފައި އޮތީ އެމްޑީޕީއާ ކަމަށެެވެ. ޕާޓީގެ އިސް ސަފުގައި މަސައްކަތް ކުރައްވަމުން ގެންދަވާތާ ގިނަ ދުވަސްތަކެއް ވެއްޖެކަމަށް ވިދާޅުވިއެވެ. އީސަ އަކީ 2013 ވަނަ އަހަރުން ފެށިގެން އެމްޑީޕީގެ ގައުމީ މަޖިލީހުގެ މެމްބަރެކެވެ.
ސަތާރަ ވަނަ މަޖިލީހުގެ މެމްބަރުކަންވެސް ކުރައްވާފައިވާ އީސަ ވިދާޅުވީ، ޕާލެމެންޓްރީ ގްރޫޕުގެ މަގާމުތަކަށް މެމްބަރުން އައްޔަން ކުރުމުގެ ކުރިން މަޖިލީހުގެ ގަވާއިދު އިސްލާހު ކުރުމުގެ މަސައްކަތް ކުރަން ޖެހޭ ކަމަށެވެ.
މަޖިލީހުގެ މަސައްކަތް ފަށައިގަނެވޭނީ ގަވާއިދު އިސްލާހުވެގެން ކަމާށާއި ކުރިޔަށް އޮތް ހަފްތާ ތެރޭގައި މަޖިލީހުގެ ކޮމިޓީ އެކުލަވާލުމާއި ގަވާއިދުގެ މަސައްކަތް ފަށައިގަނެވޭނެ ކަމަށް އޭނާ ވިދާޅުވިއެވެ. ނަވާރާ ވަނަ މަޖިލީހުގައި މުޅިން އަލަށް ސަތާރަ ކޮމިޓީއެއް ވަނީ އެކުލަވާލާފައެވެ.
އެމްޑީޕީގެ އެޖެންޑާ 19 ގައި ހިމެނޭ ޖުޑިޝަރީ އިސްލާހު ކުރުމުގެ މަސައްކަތައް އަލިއަޅުވާލަމުން އީސަ ވިދާޅުވީ، އެމްޑީޕީން ޖުޑިޝަރީ އިސްލާހު ކުރާއިރު އެކަން ކުރަންވާނީ އިންސާފުވެރި ގޮތަށް ކަމަށެވެ. އަދި ރަނގަޅަށް އެކަން ދިރާސާކޮށް ބެލިގެން ކަމަށް ވިދާޅުވިއެވެ.
މީގެއިތުރުން އަވަސް އަރުވާލައިގެން ޒާތީ ހަސަދަ ވެރިކަމެއްގައި ޖުޑިޝަރީ އިސްލާހު ކުރުމަށް ނިކުމެއްޖެނަމަ، ރައްޔިތުން ބޭނުންވާ އަދި އުއްމީދު ކުރާ ޖުޑިޝަރީ ލިބިގެންދާނެ ކަމަށް ކަމަށް ގަބޫލުފުޅު ނުކުރައްވާ ކަމަށް އީސަ ވިދާޅުވިއެވެ.
މި ފަހަކަށް އައިސް ރާއްޖޭގެ ޝަރުއީ ދާއިރާއާ މެދު ގިނަ ބަޔަކު ދަނީ ސުވާލު އުފަދަމުންނެވެ. ވަކި ފަރާތަކަށް ބުރަވެގެން މައްސަލަތައް ނިންމަމުން ދާތީވެ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
