ރާއްޖެއާ އިންޑިއާގެ ޓެމިލްނާޑުގެ ކޮޗިންއާ ދެމެދު ފެރީގެ ހިދުމަތް ފެށުމުގެ މަސައްކަތް ކުރަމުންދާ ކަމަށް އިންޑިއާގެ ފޮރިން މިނިސްޓްރީން ބުނެފިއެވެ.

ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު އިންޑިއާ އާއި ކުޅުދުއްފުއްޓާއި ދެމެދު ފެރީގެ ހިދުމަތް ފެށުމުގެ މަޝްވަރާތަކެއް ވަނީ ކުރެވިފައެވެ.

އިންޑިއާގެ ބޮޑު ވަޒީރު ނަރެންދުރާ މޯދީ ރާއްޖެއަށް ކުރައްވާ ދަތުރުފުޅާއި ބެހޭ ގޮތުން މައުލޫމާތު ހިއްސާ ކުރުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ފޮރިން ސެކެރެޓަރީ ވިޖޭ ގޯކްލޭ ވިދާޅުވީ، ވައިގެ މަގުންނާއި ކަނޑުގެ މަގުން އިންޑިއާ އާއި އަވަށްޓެރި ގައުމުތަކާއި ގުޅުވާލުމަކީ އަބަދުވެސް އިސްކަމެއްދެއްވާ ކަމެއް ކަމަށް ކަމަށާއި، އިންޑިއާ ރާއްޖެއާ ގުޅުވާލުމުގެ ޕްރޮޖެކްޓް ތަކެއް އެބަހުރި ކަމަށެވެ.

އެގޮތުން ކޮޗިނުން ރާއްޖެއަށް ފެރީގެ ހިދުމަތް ދިނުމާއި ބެހޭ ގޮތުން މަޝްވަރާ ކުރެވެމުންދާ ކަމަށެވެ. އެކަމާއި ބެހޭ ގޮތުން އިތުރު ދިރާސާތަކެއް ކުރެވެމުންދާ ކަން ފޮރިން ސެކެރެޓަރީ ފާހަގަ ކުރެއްވިއެވެ.

ވިޖޭ ވިދާޅުވީ، ރާއްޖޭގެ އެއް ރަށުން އަނެއް ރަށަށް ކިޔަވާ ކުދިންނަށް ދަތުރުކުރެވޭ ގޮތަށް ސްޕީޑް ބޯޓުގެ ހިދުމަތް ދިނުމަށް އިތުރު ޕްރޮޖެކްޓްތައް ހޯދުމުގެ މަސައްކަތް އިންޑިއާ އިން ކުރަމުންދާ ކަމަށެވެ.

އިންޑިއާ އިން ވަނީ ދާދި ފަހުން މާޅޮސްމަޑުލު ދެކުނުބުރީ ފެހެންދޫގެ ކިޔަވާ ކުދިން އެ އެރަށާ އެއްފަޅެއްގައި އޮންނަ އެ އަތޮޅު ގޮއިދޫ ސްކޫލަށް ކިޔަވަން ދިއުމަށް ރަނގަޅު ފެންވަރުގެ ފެރީއެއް ހަމަޖެއްސުމަށް 1.5 މިލިއަން ރުފިޔާ ހަމަޖައްސާފައެވެ. އެ ފައިސާ އަކީ އިންޑިއާގެ ކުރީގެ އެކްސްޗާނަލް އެފެއާރސް މިނިސްޓަރު ޝުޝްމާ ސްވާރާޖް ރާއްޖެއަށް ކުރެއްވި ޒިޔާރަތުގައި ހިލޭ އެހީގެ ދަށުން ހަމަޖެހުނު 106 މިލިއަން ދިވެހި ރުފިޔާ (6.9 މިލިއަން އެމެރިކާ ޑޮލަރު) ފައިސާ އެވެ.

ކޮޗިނުން ރާއްޖެއަށް ފެރީގެ ހިދުމަތް ދިނުމުގެ މަސައްކަތް ކުރަމުންދާ ކަމަށް އިންޑިއާގެ ފޮރިން މިނިސްޓްރީން ބުނެފައިވާއިރު، ކޮޗިން އަކީ ދިވެހިން ބޭސް ފަރުވާ އަށާއި ޗުއްޓީ ހޭދަކޮށްލުމަށް ވަރަށް ގިނައިން ދަތުރުކޮށް އުޅޭ ސިޓީއެކެވެ.