މަސްތުވާތަކެތީގެ މައްސަލާގައި މި މަހުގެ 3 ވަނަ ދުވަހު ހައްޔަރު ކުރުމުން ކޯޓުން ދޫކޮށްލި ދެ މީހުން, ތިން ވަނަ ފަހަރަށް ހައްޔަރުކޮށް ބަންދުގެ މުއްދަތަށް ހާޒިރުކުރުމުން އެ ދެ މީހުންގެ ތެރެއިން އަންހެން މީހާ ދޫކޮށްލައިފިއެވެ.
ތިން ކިލޯގެ މަސްތުވާތަކެތީގެ މައްސަލާގައި ހުޅުމާލޭގައި ހުރި ގެއަކުން ހައްޔަރު ކޮށްފައިވަނީ މަންމައަކާއި އޭނާގެ ދަރިފުޅެވެ. އުމުރުން 52 އަހަރުގެ އަންހެން މީހާ އާއި 25 އަހަރުގެ ފިރިހެން މީހާ ފުރަތަމަ ހައްޔަރު ކޮށްފައިވަނީ މި މަހުގެ 3 ވަނަ ދުވަހުގެ ރޭގައެވެ. އެ ދެ މީހުން ހައްޔަރު ކުރުމަށް ފަހު ފުރަތަމަ ފަހަރު ދޫކޮށްލީ ހައްޔަރުކުރަން ހުޅުމާލޭ ކޯޓުން ދިން އަމުރުގައި ޖިނާއީ އިޖުރާއަތުގެ ގާނޫނުގައި ބުނާ ގޮތަށް ގާޒީގެ ނަން ނެތުމުން އަމުރު ފުރިހަމަ ނުވާތީ ކަމަށް ބުނެއެވެ.
ފުލުހުންގެ މީޑިއާ އޮފިޝަލް ވިދާޅުވީ އެ އަންހެން މީހާ ދޫކޮށްލާފައިވަނީ ބަލި ހާލަތަށް ރިއާޔަތްކޮށް، ޝަރުތު ކޮށްފައި ކަމަށެވެ. އަދި ފިރިހެން މީހާގެ ބަންދަށް ހުޅުމާލެ ކޯޓުން 10 ދުވަސް ޖަހާފައިވާއިރު ބުރާސްފަތި ދުވަހުގެ އަޑުއެހުމުގައި ފިރިހެން މީހާ ބަންދުގައި ބަހައްޓަން ނިންމުމުން އެ ކޮޓަރީގައި ހުރި މަސްތުވާތަކެއްޗަކީ އޭނާ ބަހައްޓާފައި ހުރި އެއްޗެއް ކަމަށާއި އިތުރު ފުރުސަތެއް ހޯދައިގެން ފަނޑިޔާރަށް ދަންނަވާފައިވާ ކަމަށް އޮފިޝަލް ވިދާޅުވިއެވެ.
މީގެ އިތުރުން މަސްތުވާތަކެއްޗާއި ބެހޭ މައުލޫމާތު އޭނާގެ މަންމަ އަށް ނޭނގޭ ކަމަށް އޭނާ ބުނެފައިވާ ކަމަށް ވެސް ފުލުހުން ބުންޏެވެ.
ބައެއް ނޫސްތަކުގައި ބުނެފައިވާ ގޮތުގައި މި މައްސަލާގައި ހިމެނޭ 52 އަހަރުގެ އަންހެން މީހާ އަކީ ޕްރޮސެކިއުޓަރ ޖެނެރަލް އޮފީހުގެ ސީނިއަރ ޕްރޮސެކިއުޓަރެއްގެ މަންމައެވެ. އަދި ހައްޔަރު ކުރި 25 އަހަރުގެ ފިރިހެންމީހާ އަކީ ސީނިއަރ ޕްރޮސެކިއުޓަރުގެ ކޮއްކޮ ކަމަށް ވެއެވެ.
