ބައިބަލާ މުބާރާތް 32 ޓީމާ އެކު މިރޭ ފަށަނީ!

ފިތުރު އީދާ ގުޅުވައިގެން ބައިބަލާ އެސޯސިއޭޝަނުން ކޮންމެ އަހަރަކު ބާއްވާ ބައިބަލާ މުބާރާތް 32 ޓީމާ އެކު ބުދަ ދުވަހު ފަށާ ގޮތަށް ހަމަޖެހިއްޖެއެވެ.

ބައިބަލާ އެސޯސިއޭޝަނުން ބުނީ، ބައިބަލާ މުބާރާތް ބުދަ ދުވަހުގެ ރޭ 20:15 ގައި ފަށަގޮތަށް ހަމަޖެހިފައިވާ ކަމަށެވެ.

މުބާރާތުގައި ބުދަ ދުވަހުގެ ރޭ 8 މެޗު ކުޅުމަށް ހަމަޖެހިފައިވާއިރު، ފުރަތަމަ މެޗުގައި ބައްދަލުކުރާނީ އެލްޓީ ސްޕޯޓްސް ކްލަބް އަދި މަސްއޮޑި ޓައިޓަންސްއެވެ.

މި ފަހަރުގެ މުބާރާތުގައި ގިނަ ޓީމުތަކެއް ބައިވެރިވެފައިވާއިރު، ދުރާލައި ގިނަ ޓީމުތަކުން ވަނީ ކުޅުންތެރިން ގެނެސް ތަމްރީންތައް ފަށާފައެވެ. މިފަހަރު އަލަށް ބައިވެރިވި ޓީމުތައް ވެސް ނިސްބަތުން ގިނައެވެ.

މި ފަހަރުގެ މުބާރާތުން އެއް ވަނައަށްދާ ޓީމަށް އެއް ލައްކަ ރުފިޔާ ދިނުމަށް ހަމަޖެހިފައިވާއިރު، ދެވަނަ ޓީމަށް 40،000 ރުފިޔާ ދިނުމަށް ވަނީ ހަމަޖެހިފައެވެ. އަދި "މިސްޓަ ބައިބަލާ" އަށް މިފަހަރު 10،000 ރުފިޔާ ދޭއިރު، ފެއާޕްލޭ ޓީމަށް 15،000 ރުފިޔާ ދިނުމަށް ވަނީ ނިންމާފައެވެ.

މި މުބާރާތް ބޭއްވުމަށް ހަމަޖެހިފައި ވަނީ ކުޅިވަރު އެކުވެނި މެރީ ބްރައުން ފުރަގަހުގައެވެ.