ފިތުރު އީދާ ދިމާކޮށް، މާލެ ސިޓީ މަގުތަކުގައި ވެހިކަލް ދުއްވުން މަނާކޮށްފައިވާ ވަގުތުގައި ވެހިކަލް ދުއްވި މައްސަލާގައި 97 މީހަކަށް ފިޔަވަޅު އަޅައިފިއެވެ.

ފުލުހުން ބުނީ އަންގާރަ ދުވަހުގެ 16:00 އިން 18:00 އަށް މާލެ ސިޓީގައި އެއްގަމު އުނޅަދު ނުދުއްވާ ގޮތަށް ހަމަޖައްސާފަ އޮތްއޮތުން ތަންފީޒު ކުރުމަށް ފުލުހުން ކުރި މަސައްކަތުގައި 461 ވެހިކަލްއެއް ޗެކް ކޮށްފައިވާ ކަމަށެވެ.

ފުލުހުން ބުނީ ގަވާއިދާ ހިލާފުވެގެން 364 މީހަކަށް ނަސޭހަތް ދީފައިވާ ކަމަށާއި، 97 މީހަކަށް ފިޔަވަޅު އަޅާފައިވާ ކަމަށެވެ.

ފުލުހުން ބުނީ ޓްރެފިކް އޮޕަރޭޝަންތަކުގައި 32 މީހަކަށް ނަސޭހަތް ދީފައިވާ ކަމަށާއި، 49 މީހަކަށް ފިޔަވަޅު އަޅާފައިވާ ކަމަށެވެ. މާފަންނު ޕޮލިސް ސްޓޭޝަނުން ހަތް މީހަކު ޖޫރިމަނާ ކޮށްފައި ވާއިރު ގަލޮޅު ޕޮލިސް ސްޓޭޝަނުން 332 މީހަކަށް ނަސޭހަތް ދީ 34 މީހަކު މީހަކަށް ފިޔަވަޅު އަޅާފައިވާ ކަމަށް ފުލުހުން ބުންޏެވެ.

ފިތުރުއީދާ ދިމާކޮށް ހަވީރުގެ ވަގުތު ފައިމަގުގައި އުޅޭ ގޮތަށް ސިޓީ ކައުންސިލުން ހަމަޖެއްސީ އީދު މަޖާ ކުރުމުގެ ތެރޭގައި މީހަކަށް ނުވަތަ ތަނަކަށް ގެއްލުމެއް ލިބިދާނެތީއެވެ. މާލޭއާ ހުޅުމާލެ އަދި ވިލިމާލޭގައި ވެހިކަލް ދުއްވުން މަނާވި ނަމަވެސް ކައުންސިލްގެ ޚާއްސަ ހުއްދައާއެކު ޕަބްލިކް ޓްރާންސްޕޯޓްތައް ދަތުރުކުރި އެވެ.