ރޯމާއަށް ކުޅެމުން އަންނަ އިޓަލީގެ މިޑްފިލްޑަރ ޑެނިއަލް ޑި ރޮސީ ހޯދުމަށް އާސެނަލްއިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

އިނގިރޭސި ނޫސްތަކުން ބުނާގޮތުން ކުރިޔަށް އޮތް ސީޒަނަށް އަމާޒުކޮށް، އާސެނަލްއިން އަންނަނީ އެ ކްލަބް ވަރުގަދަކުރުމަށް މަސައްކަތް ކުރަމުންނެވެ. އެގޮތުން އެ ކްލަބުން ކުރިޔަށް އޮތް ސީޒަނަށް އަމާޒުކޮށް، ހޯދުމަށް މަސައްކަތް ކުރަމުން އަންނަ ކުޅުންތެރިން ތެރޭގައި ޑި ރޮސީވެސް ހިމެނޭ ކަމަށެވެ.

އާސެނަލްގެ އިރުން ލިވަޕޫލުންވެސް އަންނަނީ ޑި ރޮސީ ހޯދުމަށް މަސައްކަތް ކުރަމުންނެވެ.

މި ސީޒަނަށްފަހު ރޯމާ ދޫކޮށްލާނެކަން އިއުލާންކޮށްފައިވާ ޑި ރޮސީ ކުރިޔަށް އޮތް ސީޒަނުގައި ކުޅޭނެ ކްލަބެއް އަދި ކަށަވަރެއް ނުވެއެވެ. ނަމަވެސް އޭނާ ބަދަލުވުން ގާތީ ޕްރިމިއާ ލީގަށް ކަމަށް ރިޕޯޓްތައް ބުނެއެވެ.

ރޯމާއާ 2001 ވަނަ އަހަރުގެ ސީޒަނުގައި ގުޅުނު ޑި ރޮސީ ވަނީ އެ ކްލަބަށް މިހާތަނަށް ކުޅުނު 614 މެޗުގައި 63 ލަނޑު ކާމިޔާބު ކޮށްފައެވެ. އޭނާ ވަނީ ރޯމާއާއެކު ކޮޕައިޓަލިއާ ދެފަހަރު ކާމިޔާބު ކޮށްފައިވާ ޑި ރޮސީ ވަނީ އެ ކްލަބާއެކު އިޓާލިއަން ސުޕަކަޕްވެސް ކާމިޔާބުކޮށްފައެވެ.

މީގެއިތުރުން އޭނާ ވަނީ އިޓާލިއަން ލީގުގެ އެންމެ މޮޅު ޒުވާން ކުޅުންތެރިޔާގެ މަގާމު 2006 ވަނަ އަހަރު އަދި އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު 2009 ވަނަ އަހަރު ހޯދާފައެވެ.

އިޓަލީ ގައުމީ ޓީމާއެކު 21 އަހަރުން ދަށުގެ ޔޫރޯ ކާމިޔާބު ކޮށްފައިވާ ޑި ރޮސީ ވަނީ 2006 ވަނަ އަހަރު ވޯލްޑްކަޕް ވެސް އިޓަލީއާއެކު ކާމިޔާބު ކޮށްފައެވެ. އޭނާ ވަނީ އިޓަލީ ގައުމީ ޓީމަށް ކުޅުނު 117 މެޗުގައި 21 ލަނޑު ކާމިޔާބު ކޮށްފައެވެ.