މޯލްޑިވިއަން ފްލައިޓް އޮޕަރޭޝަންސް ޑިރެކްޓަރު މަގާމުން ދުރުކޮށްފި
މަގާމުން ދުރުކުރީ އާދިއްތަ ދުވަހު
އަމީން މަގާމުން ވަކިކޮށްފައިވަނީ ޕައިލެޓުން އިހުތިޖާޖް ކޮށްފައި ވަނިކޮށް
ދިވެހިރާއްޖޭގެ ގައުމީ އެއާލައިން މޯލްޑިވިއަންގެ ޑައިރެކްޓަރ އޮފް ފްލައިޓް އޮޕަރޭޝަންސް ކެޕްޓަން މުހައްމަދު އަމީން މަގާމުން ދުރުކޮށްފިއެވެ.
އެނގިފައިވާ ގޮތުން އަމީން މަގާމުން ދުރުކޮށްފައިވަނީ މި އަހަރުގެ ފެބްރުއަރީ މަހު މޯލްޑިވިއަންގެ ގިނަ ޕައިލެޓުންތަކެއް އޭނާއާ ދެކޮޅަށް ހަޅުތާލުކުރުމާއި ގުޅިގެންނެވެ. ޕައިލެޓުން އެންމެ ބޮޑަށް އެދުމަކަށްވީ އޭނާ އެމަގާމުން ވަކިކުރުމަށެވެ.
މޯލްޑިވިއަންގެ ޕަބްލިކް ރިލޭޝަން މެނޭޖަރ މޫސަ ވަސީމް ރާއްޖެ.އެމްވީ އަށް ވިދާޅުވީ، އަމީން މަގާމުން ދުރުކުރަން ނިންމީ ބޯޑުގެ ލަފާގެ މަތިން ކަމަށެވެ. އެހެން ނަމަވެސް އޭނާ އެ ކުންފުނިން ވަކި ކޮށްފައެއް ނުވެއެވެ.
އާދިއްތަ ދުވަހުން ފެށިގެން ވަގުތީ ގޮތުން އެމަގާމާ ހަވާލުވެފައިވަނީ އެސިސްޓެންޓް ޑައިރެކްޓަރ ފްލައިޓް އޮޕަރޭޝަންސް ކެޕްޓަން މުހައްމަދު ސުނޫސީއެވެ.
ފަންސަވީހަކަށް ވުރެ ގިނަ ޕައިލެޓުން އަމީންއާ ދެކޮޅަށް ކުރި އިހުތިޖާޖު ހުއްޓާލީ ޓްރާންސްޕޯޓް މިނިސްޓަރު އައިޝަތު ނަހުލާއާ ބައްދަލު ކުރުމަށްފަހުއެވެ.
ޕައިލެޓުންގެ ކަންބޮޑުވުމަށް ހައްލެއް ހޯދައިދޭނެ ކަމަށް މިނިސްޓަރު ނަހުލާ ވަނީ ވިދާޅުވެފައެވެ.
