މޯދީ މަޖިލިސްގައި ތަގްރީރް ކުރައްވަނީ މިމަހު 8 ގައި
2 ޖޫން 2019 | އާދީއްތަ 10:13މޯދީ ތަގްރީރް ކުރައްވާނީ މިމަހު 8 ވަނަ ދުވަހުގެ ރޭގަނޑު 8.45 ގައި
އިންޑިޔާގެ ބޮޑު ވަޒީރު ނަރެންދުރަ މޯދީ އަދި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު
އިންޑިޔާގެ ބޮޑު ވަޒީރު ނަރެންދުރަ މޯދީ ރައްޔިތުންގެ މަޖިލީހުގައި ވާހަކަފުޅު ދައްކަވާނީ 8 ޖޫންގައި ކަމަށް މަޖިލީހުގެ އިދާރާއިން ބުނެފިއެވެ.
މަޖިލީހުގެ އިދާރާއިން ބާއްވަމުން އަންނަ ނޫސްވެރިންގެ ބައްދަލުވުންތަކުގެ ތެރެއިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަޖިލީހުގެ އަމީން އާންމު ފާތިމަތު ނިއުޝާ ވިދާޅުވީ، އިންޑިޔާގެ ބޮޑު ވަޒީރު ނަރެންދުރަ މޯދީ މަޖިލީހުގައި ވާހަކަފުޅު ދައްކަވާނީ 8 ޖޫންގެ ރޭގަނޑު 8.45 ގައި ކަމަށެވެ.
މި ޖަލްސާގައި ކެބިނެޓް މިނިސްޓަރުންނަށް ދައުވަތު އަރުވާނެ ކަމަށް ނިއުޝާ ވިދާޅުވިއެވެ.
އިންޑިއާގެ ބޮޑުވަޒީރުގެ މަގާމަށް ދެ ވަނަ ދައުރަކަށް އިންތިހާބުވެވަޑައިގެންނެވި ނަރެންދުރަ މޯދީ މަގާމާ ހަވާލުވެވަޑައިގަތުމަށް ފަހު ފުރަތަމަ ފަހަރަށް އިންޑިއާ އިން ބޭރަށް ކުރައްވާ ދަތުރުފުޅުގައި ރާއްޖެ ވަޑައިގެން، ރައްޔިތުންގެ މަޖިލީހުގައި ތަގުރީރު ކުރެއްވުމަށް ދައުވަތު ދިނުމަށް މަޖިލީހުން ފާސްކޮށްފައިވަނީ 29 މެއިގައި އޮތް ރައްޔިތުންގެ މަޖިލީހުގެ ޖަލްސާގައެވެ.
ރައްޔިތުންގެ މަޖިލިސް ކުރާ ގޭގައި ތަގްރީރް ކުރެއްވުމުގެ ފުރުސަތު ގައުމުތަކުން އަރުވަނީ، އެ ގައުމަކުން އެ މެހްމާނަކަށް ދެވޭނެ އެންމެ މަތީ ޝަރަފު އެރުވުމުގެ ގޮތުންނެވެ.
މޯދީ ރާއްޖެ ވަޑައިގަންނަވާނީ ޖޫން މަހުގެ 7 ވަނަ ދުވަހުއެވެ.
މީގެ ކުރިން އިންޑިއާގެ ކުރީގެ ބޮޑުވަޒީރު މަންމޯހަން ސިންގް ވެސް ވަނީ 2011 ވަނަ އަހަރުގެ ނޮވެމްބަރު މަހު މަޖިލީހުގައި ތަޤުރީރު ކުރައްވާފައެވެ.
