ތޮއްޑޫ އިން ތިން ލައްކަ އަށް ވުރެ ގިނަ ކިލޯގެ ކަރާ ބޭރު ކުރެވިއްޖެ: ކައުންސިލް
1 ޖޫން 2019 | ހޮނިހިރު 14:29މާލެ ފޮނުވާ މުދާތައް މާލެއަށް ބާލާ ބެހެއްޓުމުގައި ދަތިތައްކުރި މަތިވި
ތޮއްޑޫގެ ކަރާ ދަނޑުތައް
އއ. ތޮއްޑޫ އިން ތިން ލައްކަ އަށް ވުރެ ގިނަ ކިލޯގެ ކަރާ ބޭރު ކުރެވިފައިވާ ކަމަށް އެ ރަށުގެ ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެރަށުގެ ކައުންސިލްގެ ރައީސް ހަދިޖާ ނިއުޝާ ވިދާޅުވީ ރޯދަ މަސް ދިޔައީ ވަރަށް އަމާން އޮމާންކަމާ އެކު ކަމަށާއި، ދަނޑުވެރިންނާއި، އޮޑިވެރިން މަސައްކަތްތައް ކުރީ ވަރަށް ގުޅިގެން ކަމަށެވެ.
ނިއުޝާ ވިދާޅުވީ ރޯދައަށް ޚާއްސަކޮށް ހެއްދި ކަރާ ދަނޑުތަކުން މިއަހަރު ތިންލައްކަ ފަންސާސްހާސް ކިލޯ އަށް ވުރެ ގިނަ ކަރާ ރަށުން ބޭރު ކުރެވިފައިވާ ކަމަށެވެ.
މިއީ ވަރަށް ބޮޑު ކުރިއެރުމެއްކަން ފާހަގަކުރައްވާ ނިއުޝާ ވިދާޅުވީ އެހެން އަހަރުތަކާ ހިލާފަށް މިއަހަރު ކަރާ ދަނޑުތައް ރަނގަޅު ކަމަށާއި، ބަލިތައް މަދު ކަމަށެވެ. އަދި މާބޮޑު ދަތިތަކެއް ދިމާ ނުވާ ކަމަށް އޭނާ ވިދާޅުވިއެވެ.
ނަމަވެސް އޮޑިވެރިންނާ ހަވާލާދީ ނިއުޝާ ވިދާޅުވީ މާލެ ފޮނުވާ މުދާތައް މާލެއަށް ބާލާ ބެހެއްޓުމުގައި ދަތިތައްކުރި މަތިވި ކަމަށެވެ. އޭނާ ވިދާޅުވީ ދޯނި ކައިރި ކުރަނީ މާލޭގެ ދަތުރުވެރިންގެ މާރުކޭޓާ ދިމާލަށް ކަމަށާއި، މުދާތައް ބެހެއްޓުމަށް އެތަނުން އެކަށީގެންވާ ޖާގަ ނުލިބު ކަމަށެވެ.
