އިސް މަޤާމުތަކަށް އަންހެން ބޭފުޅުން އިންތިހާބު ވެގެން ދިއުމަކީ އުއްމީދީ ބަދަލެއް: ޝިދާތާ
30 މެއި 2019 | ބުރާސްފަތި 11:23މަޖިލީހުގެ ނައިބު ރައީސްގެ މަގާމަށް އީވާ އަބްދުﷲ ވަނީ އިންތިޚާބު ކޮށްފަ
ޖެންޑަރ މިނިސްޓަރ ޝިދާތާ ޝަރީފް
އިސް މަޤާމުތަކަށް އަންހެން ބޭފުޅުން އިންތިހާބު ވެގެން ދިއުމަކީ އުއްމީދީ ބަދަލެއް ކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވެއްޖެއެެވެ.
ބުރާސްފަތި ދުވަހު ޝިދާތާ ކުރެއްވި ޓްވީޓެއްގައި ވިދާޅުވީ، ރައްޔިތުންގެ މަޖިލީހުގެ ނައިބު ރައީސްގެ މަޤާމާއި ޖުޑީޝަލް ސާރވިސް ކޮމިޝަން (ޖޭއެސްސީ)ގެ މެމްބަރު ކަމަށް އަންހެން ބޭފުޅުން އިންތިހާބު ކުރެވިގެން ދިއުމަކީ 19 ވަނަ ރައްޔިތުންގެ މަޖިލީސް ފެށުމާ އެކު ރައްޔިތުންގެ ވިންދާ ގުޅިފައިވާ އުންމީދީ ބަދަލުތަކެއް ފެންނަމުންދާ ކަމުގެ މިސާލެއް ކަމަށެވެ.
މިނިސްޓަރ އެހެން ވިދާޅުވެފައިވާއިރު، ރައްޔިތުން މަޖިލީހުގެ ނައިބު ރައީސްގެ މަގާމަށް 76 މެންބަރުންގެ ވޯޓާ އެކު ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ އިންތިޚާބު ކޮށްފައެވެ. އަދި އީވާއަކީ މަޖިލީހުގެ ނައިބު ރައީސް ކަމަށް އިންތިހާބު ކުރެވުނު ދެ ވަނަ އަންހެން ކަމަނާއެވެ. އޭގެ އިތުރުން، 81 މެންބަރުގެ ތާއީދާ އެކު ޖޭއެސްސީ އަށް މަޖިލީހުން ކަނޑައަޅާ މެންބަރަކަށް ތުޅާދޫ ދާއިރާގެ މެމްބަރު ހިސާން ހުސައިންގެ ނަން މަޖިލީހުން ވަނީ ފާސްކޮށްފައެވެ.
ރާއްޖޭގެ ސިޔާސީ މައިދާނުގައި އަންހެނުންގެ ހިއްސާ މިހާރަށް ވުރެ އިތުރުވާން ޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެސް ވަނީ ވިދާޅުވެފައެވެ. އެގޮތުން ރާއްޖޭގެ ސިޔާސީ މަސްރަހަށް، އަދި ގައުމުގެ މަތީ މަޤާމުތަކަށް، ދިވެހި އަންހެނުންގެ ބޭނުންތެރިކަން އިންތިހާއަށް ބޮޑު ކަމަށް ވެސް އެ މަނިކުފާނު ވަނީ ވިދާޅުވެފައެވެ.
