އެމްޓީސީސީގެ އަހަރީ އާއްމު ޖަލްސާ ޖޫން 15ގައި
ޖަލްސާގައި ބައިވެރިވެވޭނީ ޖޫން 3ގެ ނިޔަލަށް ރަޖިސްޓްރީކޮށްފައިވާ ފަރާތްތަކަށް
އެމްޓީސީސީގެ އަަހަރީ އާންމު ޖަލްސާގެ ތެރެއިން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ އަހަރީ އާއްމު ޖަލްސާ އަންނަމަހުގެ 15 ގައި ބާއްވަން ނިންމައިފިއެވެ.
އެމްޓީސީސީން ބުނީ އަހަރީ އާއްމު ޖަލްސާ ޖޫން 15 ގައި ބާއްވަން ނިންމާފައިވާ ކަމަށާއި، ޖަލްސާގައި ބައިވެރިވާން ބޭނުންވާ ފަރާތްކުން އެކުންފުނީގެ "އަހަރީ އާއްމު ޖަލްސާ 2018އަށް ރަޖިސްޓަރކުރުމަށް އެދޭ ފޯމް" ޖޫންމަހުގެ 13 ވަނަ ދުވަހުގެ ކުރިން ހުށަހަޅައި ރަޖިސްޓަރީ ވާންޖެހޭ ކަމަށެވެ.
ޖަލްސާއަށް ރަޖިސްޓަރީވާ ފަރާތްތަކަށް ރަޖިސްޓަރ ކޮށްފައިވާކަމުގެ ސްލިޕެއް ހަވާލުކުރެވޭނެ ކަމަށާއި ޖަލްސާއަށް ވަޑައިގަންނަވާއިރު، މިސްލިޕް ގެންނަން ޖެހޭނެ ކަމަށް އެމްޓީސީސީން ބުންޏެވެ.
މީގެ އިތުރުން އެމްޓީސީސީން ބުނީ އަހަރީ އާއްމު ޖަލްސާގައި ބައިވެރިވެވޭނީ ޖޫން 3ގެ ނިޔަލަށް އެކުންފުނީގެ ހިއްސާދާރުންގެ ގޮތުގައި ރަޖިސްޓްރީކޮށްފައިވާ ފަރާތްތަކަށް ކަމަށެވެ. އަދި އަހަރީ އާއްމު ޖަލްސާ ބޭއްވުމަށް ހަމަޖެހިފައިވަނީ ހޮޓެލް ޖެންގައި ކަމަށެވެ.
އެމްޓީސީސީން ބުނީ އަހަރީ އާއްމު ޖަލްސާގައި ހިއްސާދާރުންނަށް ބަހާނެ ފައިދާއާއި ގުޅޭގޮތުން ޑިރެކްޓަރުންގެ ބޯޑުން ހުށަހަޅާފައިވާ ހުށަހެޅުމާ މެދު ގޮތެއް ނިންމާނެ ކަމަށެވެ. މިދިޔައަހަރު އެމްޓީސީސީއަށް ލިބިފައިވާ ފައިދާވަނީ ދަށްވެފައިވާތީ މިއަހަރުގެ މާލީ ހާލަތަށް ރިއާޔަތްކޮށް ނިމިދިޔަ އަހަރުގެ ހިއްސާ ފައިދާ ނުބެހުމަށް އެކުންފުނީގެ ޑިރެކްޓަރުންގެ ބޯޑުންވަނީ ނިންމާފައެވެ. އަހަރީ އާއްމު ޖަލްސާއަށް މިކަން ހުޅަހެޅުން ވެސް އޮންނާނެ ކަމަށް އެމްޓީސީސީން މައުލޫމާތުދެއެވެ.
