ފަނޑިޔާރުގެ ސިމްޕޯޒިއަމްގައި ވެސް ފާހަގަވީ ފަނޑިޔާރުގެއަށް ނުފޫޒު ވަދެފައިވާ މިންވަރު
ގާނޫނީ ވަކީލް ޝުނާނާ
ސިޔާސީ ނުފޫޒުގައި ޖެހިފައި ތިބި އަދި ކޮރަޕްޝަންގެ ތުހުމަތު ކުރެވިފައިވާ ފަނޑިޔާރުން، ފަނޑިޔާރު ގޭގައި ބައި ތިއްބައިގެން ޖުޑިޝަރީ އިސްލާހު ނުކުރެވޭނެ ކަމަށް ގާނޫނީ ވަކީލް މަރިޔަމް ޝުނާނާ ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން ޝުނާނާ ވިދާޅުވީ ޖުޑިޝަރީ އިސްލާހުކުރުމުގެ ވާހަކަ ދައްކާއިރު އޮތީ މައިގަނޑު ދެ ކަމެއް ވާހަކަދެކެވެމުން އަންނަ ކަމަށެވެ. އެއީ ކޮރަޕްޝަނުން ފަނޑިޔާރުގެ ސަލާމަތް ކުރުމާއި، ފަނޑިޔާރު ގޭގެ އިދާރީ ކަންތައް އިސްލާހުކުރުން ކަމަށެވެ. ފަނޑިޔާރުގެއަށް ވަދެފައި އޮތް ނުފޫޒާއި ކޮރަޕްޝަންގެ ކަންކަމަކީ އެފަދަ ތުހުމަތުތަކެއް ކުރެވިފައިވާ ފަނޑިޔާރުން އެ މަގާމުތަކުގައި ބައިތިއްބައިގެން އިސްލާހުކުރެވޭނެ ކަމެއް ނޫން ކަމަށެވެ.
ފަނޑިޔާރުން ވެސް ފަނޑިޔާރުގެ ސިމްޕޯޒިއަމްގައި ވެސް ފާހަގަކޮށްފައިވަނީ ފަނޑިޔާރުގެއަށް ނުފޫޒުވަދެފައިވާ ކަން ކަމަށާއި، އެކަންކަމުން ފަނޑިޔާރުގެ ސަލާމަތްކުރަން އަޅަންޖެހޭ ފިޔަވަޅުތަކުގެ ވާހަކަ ކަމަށް ޝުނާނާ ވިދާޅުވިއެވެ.
ފަނޑިޔާރުގެއަކީ ކޮރަޕްޓްވެފައިވާ ތަނެއް ކަމަށް ފަނޑިޔާރުން ގަބޫލުކުރައްވާ ކަމަށްވާނަމަ ، ނޫނީ ކޮރަޕްޓް ފަނޑިޔާރުން ތިބޭ ކަމަށް ވާނަމަ، އެ މީހުން އެ މަގާމުގައި ބައިތިއްބައިގެން އިސްލާހެއް ނުކުރެވޭނެކަން ޝުނާނާ ފާހަގަކުރެއްވިއެވެ.
ފަނޑިޔާރުންނަކީ ކޮރަޕްޓް ނުފޫޒުގައި ޖެހިފައިވާ ބައެއް ކަމަށް ގަބޫލުކުރެވިއްޖެ ނަމަ ނުވަތަ އެފަދަ ކަންކަމަށް މަގުފަހިވާ ފަދަ ކަންތައްތަކެއް ހުރި ކަމަށްވާ ނަމަ ދެން އިސްލާހު ކުރަން އޮތް ހަމައެކަނި ގޮތަކީ އެ ފަރާތްތައް މަގާމުން ދުރުކުރުން ކަމަށް ޝުނާނާ ވިދާޅުވިއެވެ. އަދި އެ ފަރާތްތަކާ ދޭތެރޭ ފިޔަވަޅު އަޅަންޖެހޭ ފަރާތްތަކުން ފިޔަވަޅު އެޅުން ކަމަށް ޝުނާނާ ވިދާޅުވިއެވެ.
