އެމްޑީޕީ ތެރޭގައި ފެކްޝަންތަކެއް ނެތް ކަމަށާއި އެ ޕާޓީގެ ތެރޭގައި ހިޔާލުތަފާތުވުންތައް ހުރުމަކީ ކަންކަން ކުރިއެރުމަށް ލިބޭ މުއްސަނދިކަމެއް ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން އިންތި ވިދާޅުވީ، އެމްޑީޕީއަކީ ވަރަށް ވަރުގަދަ ޕާޓީއެއް ކަމަށާއި، އެމްޑީޕީ ތެރޭގައި ފެކްޝަންތަކެއް ނެތް ކަމަށެވެ.
އޭނާ ވިދާޅުވީ، އެމްޑީޕީއަކީ އަބަދުވެސް އެކަތިގަނޑެއްގެ ގޮތުގައި އޮންނަ ޕާޓީއެއް ކަމަށާއި، އިންތިހާބުތަކުގައި ކާމިޔާބީތައް ވެސް ހޯދުމަކީ ވެސް އެކަމުގެ ދަލީލެއްކަމަށެވެ.
އެކި ކަންކަމުގައި ޕާޓީ ތެރޭގައި ހިޔާލު ތަފާތުވާ ކަމަށާއި އެ ހިޔާލުތަފާތުވުންތަކަކީ ޕާޓީގެ ކަންކަން ކުރިއެރުވުމަށް ލިބޭ މުއްސަނދި ކަމެއް ކަމަށް ފާހަގަ ކުރައްވައި އިންތި ވިދާޅުވީ އެމްޑީޕީއަކީ އަބަދުވެސް އެއް ވިސްނުމަކަށް މަސައްކަތްކުރާ ޕާޓީއެއް ކަމަށެވެ.
"ބައެއް ކަންކަމުގައި އެމްޑީޕީ ތެރޭގައި ހިޔާލު ތަފާތުވުންތައް އުޅޭ. އެއީ ލިބޭ ގެއްލުންތަކެއް ނޫން. އެއީ ޕާޓީ ދެ ފެކްޝަނަކަށް ބެހުމެއްވެސް ނޫން. އެމްޑީޕީ ވަރުގަދަ ޕާޓީއެއް ގޮތުގައި އޮތުމަކީވެސް ދެ ފެކްޝަނަކަށް ނުބެހޭކަމުގެ ދަލީލެއް،" އިންތި ވިދާޅުވިއެވެ.
އިންތި ވިދާޅުވީ އާ މަޖިލިސް ހުވާކުރާއިރު، ރައްޔިތުން ވަނީ އެޖެންޑާ 19 ތަންފީޒު ކުރުމަށް އެމްޑީޕީއަށް ވަރަށް ބޮޑު އަޢުލަބިއްޔަތެއް ދީފައިވާ ކަމަށާއި، އެ މަސައްކަތް ލަސްކުރެވެން ނެތް ކަމަށެވެ.
އެގޮތުން އިންތި ވިދާޅުވީ، އެކި އެކި ގާނޫނީ އޮނިގަނޑުތައް އެކުލަވާލުމުގެ އިތުރުން ވަޒީރުން ވެސް ހިމެނޭ ގޮތަށް އެ މަސައްކަތްތައް ކުރާނެ ކޮމިޓީތައް ވެސް އެކުލަވާލެވިފައިވާ ކަމަށެވެ.
"އެމްޑީޕީގެ ތަސައްވަރު އެޖެންޑާ 19 ހަގީގަތަކަށް ހެދުމަށް އެމްޑީޕީއަށް ރައްޔިތުން ބޮޑު މެޖޯރިޓީއެއް ދިނީ. މަސައްކަތް ލަސްކުރެވޭކަށް ނެތް. މި މަސައްކަތް ޕާޓީގައި މިހާރުވެސް ވަރަށް ބާރަށް ކުރިއަށްދޭ،" އިންތި ވިދާޅުވިއެވެ.
އަލަށް ހުވާ ކުރާ ރައްޔިތުންގެ މަޖިލީހުގެ ރިޔާސަތުގައި އިންނަވާނީ އެމްޑީޕީއަށް ނިސްބަތްވާ މަޖިލިސް މެމްބަރެއް ކަމަށް ފާހަގަކުރައްވަމުން އިންތި ވިދާޅުވީ، އެއީ ވަރަށް ބޮޑު ފަޚުރެއް ކަމަށާއި، އެއީ ގިނަ ބަޔަކު އުންމީދު ކުރަމުން އައި ކަމެއް ކަމަށެވެ.
އިންތި ވިދާޅުވީ، ރައްޔިތުންގެ މަޖިލީހުގެ ފުރަތަމަ ޖަލްސާގެ ކުރިން، މަޖިލީހުގެ ރައީސް ކަމަށް ގެންނާނެ ބޭފުޅަކު ޕާޓީން ނިންމާނެ ކަމަށާއި، ކޮންމެ ބޭފުޅަކު ހޮވުނު ނަމަވެސް އިސްކަންދޭނީ ޕާޓީ އަދި ސަރުކާރުން ކުރަމުންދާ މަސައްކަތަށް ކަމަށެވެ.
"އެންމެ ބޮޑަށް ވާހަކަދެކެވެނީ ރިޔާސަތަށް އަންނާނީ ކާކުތޯ. ފުރަތަމަ ޖަލްސާގެ ކުރިން ޕާޓީން ގޮތެއް ނިންމާނެ. ކޮންމެ ބޭފުޅަކު ހޮވުނަސް އިސްކަންދޭނީ ޕާޓީ އަދި ސަރުކާރުން ކުރަމުންދާ މަސައްކަތަށް،" އިންތި ވިދާޅުވިއެވެ.
މަޖިލިސްގެ ރައީސް ކަމަށް އެމްޑީޕީން މިހާތަނަށް ޝައުގުވެރިކަން ފާޅުކޮށްފައިވަނީ ފަސް ބޭފުޅެކެވެ. އެއީ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް، މަރަދޫ ދާއިރާގެ މެމްބަރު އިބްރާހިމް ޝަރީފް، ވިލުފުށި ދާއިރާގެ މެމްބަރުކަމަށް އިންތިޚާބުވެވަޑައިގެންނެވި ހަސަން އަފީފުގެ އިތުރުން މެދުހެންވޭރު ދާއިރާގެ މެމްބަރު އަލީ އާޒިމެވެ.
