މޯދީ ރާއްޖެ ވަޑައިގަންނަވަނީ
25 މެއި 2019 | ހޮނިހިރު 12:51މޯދީ ރާއްޖެ ވަޑައިގަތުމަށް ހަމަޖެހިފައިވަނީ އަންނަ މަހުގެ 7 އިން 8 އަށް
އިންޑިއާގެ ބޮޑު ވަޒީރު ނަރެންދްރަ މޯދީ އާއި ރައީސް އިބްރާހިމް މުހައްމަދު ސާލިޚު
އިންޑިއާގެ ބޮޑުވަޒީރު ނަރެންދުރަ މޯދީ އަންނަ މަހު ރާއްޖެވަޑައިގަތުމަށް ހަމަޖެހިއްޖެ ކަމަށް ބައެއް ނޫސްތަކުން ރިޕޯޓް ކޮށްފިއެވެ.
ރާއްޖެ އެމްވީއަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު އެކަން ދޮގެއް ނުކުރައްވައެވެ. ހޫދު ވިދާޅުވި ގޮތުގައި މޯދީ ރާއްޖެ ވަޑައިގަންނަވާ ތާރީހެއް ރަސްމީކޮށް އެނގިފައެއް ނުވެއެވެ.
ބައެއް މީޑިއާތަކުން ބުނާ ގޮތުގައި މޯދީ ރާއްޖެ ވަޑައިގަންނަވަނީ އިންޑިއާގެ އާންމު އިންތިޚާބު ކާމިޔާބު ކުރައްވާ ދެވަނަ ދައުރަކަށް އިންތިޚާބުވެވަޑައިގަތުމަށް ފަހު މި ސަރަޙައްދުގެ ޤައުމުތަކަށް ކުރައްވާ ދަތުރުފުޅުގެ ތެރެއިންނެވެ.
މި ދަތުރުފުޅުގައި މޯދީ ރާއްޖެ ވަޑައިގަތުމަށް ހަމަޖެހިފައިވަނީ އަންނަ މަހުގެ 7 އިން 8 އަށް ކަމަށް ޚަބަރުތައް ބުނެއެވެ.
ރައީސް ޔާމިންގެ ސަރުކާރުން ގެންގުޅުނު ހާރިޖީ ސިޔާސަތުގެ ސަބަބުން އިންޑިއާއާއި ރާއްޖޭގެ ގުޅުން ހީނަރުވެފައި ވަނިކޮށް، ރައީސް ސޯލިހު ވެރިކަމަށް ވަޑައިގެންނެވުމަށް ފަހު ވަނީ އެ ގުޅުން އަލުން ބަދަހި ކުރައްވާފައެވެ.
އަދި އިންޑިއާގެ ޢާންމު އިންތިޚާބު ބޮޑު ތަފާތަކުން ކާމިޔާބު ކުރެއްވުމާއި ގުޅިގެން ޞާލިޙް ވަނީ މޯދީއަށް މަރުހަބާ ދަންނަވާފައެވެ.
