ދިއްފުށީގައި ހިނގި ހަމަނުޖެހުންތައް ކޮންޓްރޯލް ކުރެވިއްޖެ: ފުލުހުން
25 މެއި 2019 | ހޮނިހިރު 07:41އިތުރު ފުލުހުންތަކެއް ވަނީ މައްސަލަ ތަހުގީގު ކުރަމަށް ދިއްފުއްޓަށް ގޮސްފައި
ފުލުހުން ދިއްފުށީގައި ސައިކަލެއް ޗެކްކުރަނީ
ކ.ދިއްފުށީ ގައި ރައްޔިތުންނާއި ''ވަގުންނާ'' ދެމެދު ހިނގި ކުރިމަތިލުންތައް ކޮންޓްރޯލް ކުރެއްވިއްޖެ ކަމަށް ފުލުހުން ބުނެފިއެވެ.
މިދިޔަ ބުދަ އަދި ބުރާސްފަތި ދުވަހުގެރޭ ދިއްފުށީ ރައްޔިތުންނާއި ވައްކަން ކުރި ކަމަށް ތުހުމަތު ކުރެވޭ ބަޔަކާ ދެމެދު ވަނީ ކުރިމަތިލުންތަކެއް ހިނގާފައެވެ.
ކުރިމަތިލުންތަކުގައި ވައްކަން ކުރި ކަމަށް ތުހުމަތު ކުރެވޭ ބައެއް މީހުންނަށް ވަނީ އެކި ވަރުގެ އަނިޔާވެފައެވެ. އެރަށުގެ އެންމެ ތަނަވަސް ''ލަވްލީ ސްޓޯރު'' ފިހާރައިން ވަގަށް ނަގާފައިވާ ތިޖޫރީ ރަށު ރައްޔިތުން ވަނީ ނިކުމެ ހޯދާފައެވެ. އަދި އެކަން ކުރި ކަމަށް ތުހުމަތުކުރެވޭ މީހަކަށް އަށް ވަނީ އަނިޔާކޮށްފައެވެ.
ދިއްފުށީގައި ހިނގި ހަމަނުޖެހުންތަކުގައި މިހާތަނަށް ތިން މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އޭގެ ތެރެއިން އެކަކުގެ ބަންދަށް ކ. ތުލުސްތޫ ކޯޓުން ވަނީ ތިން ދުވަހުގެ މުއްދަތު ޖަހާފައެވެ.
ހުކުރު ދުވަހުން ފެށިގެން ފުލުހުން ތުލުސްދޫ ގައި ފޯރިމަރަށް ފަށާފައިވާ އިރު، ފުލުހުންގެ މީޑިއާ އޮފިޝަލް ރާއްޖެ.އެމްވީ އަށް ވިދާޅުވީ، ރަށުގައި ހިނގި ހަމަނުޖެހުންތައް މިހާރު ކޮންޓްރޯލް ކުރެވިފައިވާ ކަމަށެވެ.
އަދި މައްސަލަ ތަހުގީގު ކުރުމަށް މާލެއިން ފުލުހުންގެ ޓީމެއް އެރަށަށް ގޮސްފައިވާ ކަން ފުލުހުން ވަނީ ކަށަވަރު ކޮށްދީފައެވެ. އިތުރު ބަޔަކު ހައްޔަރު ކުރި ކަމެއް އެނގިފައެއް ނުވެއެވެ.
ނަން ނުޖަހަން ޝަރުތުކޮށް ދިއްފުށިން ވާހަކަ ދެއްކި މީހަކު ބުނީ، ވައްކަން ކުރި ކަމަށް ތުހުމަތު ކުރެވޭ ތިން މީހަކު ހައްޔަރުކުރުމުން ރަށުގެ ހާލަތު ރަނގަޅުވެފައިވާ ކަމަށެވެ.
އެކަމަކު ރައްޔިތުން ބޭނުންވަނީ ''ލަވްލީ ސްޓޯރު'' ފިހާރަ ފަޅާލުމުގައި ބައިވެރިވި ހުރިހާ އެންމެން ވެސް ހައްޔަރުކޮށް ނެގި ފައިސާތައް ހޯދުން ކަމަށެވެ. އެ މީހާ ބުނީ، އެކަމުގައި ބައިވެރިވި ދެ މީހަކު ރަށުގައި އަދިވެސް އެބައުޅޭ ކަމަށެވެ. ރައްޔިތުން ނިކުމެ ކުރި މަސައްކަތުން ވަގަށް ނެގި ފައިސާގެ ބައެއް ވަނީ ހޯދާފައެވެ.
ދިއްފުށީގެ ރައްޔިތުން ބުނާ ގޮތުން މި ފަހަކަށް އައިސް ދުވަހަކު ވެސް އިތުރު ނުވާ ވަރަށް ވައްކަން ވަނީ އިތުރުވެފައެވެ. ފަސް މީހުންގެ ގުރޫޕެއް ހަދައިގެން ރަށުގެ ފިހާރަތަކާއި ގެތަކުން ވައްކަން ކުރާ ކަމަށް އެ މީހުން ތުހުމަތު ކުރެއެވެ.
މީގެ ކުރިން ހަތްވަރަކަށް ފަހަރު ''ލަވްލީ ސްޓޯރު'' ވަނީ ފަޅާލާފައެވެ. އެކަން ކުރާ މީހުންނަކީ މަސްތުވާތަކެތި ބޭނުންކޮށް ކުށުގެ ރެކޯޑް އޮންނަ މީހުން ކަމަށް ވެސް ރަށުން ވާހަކަ ދެއްކި މީހާ ބުންޏެވެ.
މާލެ އަތޮޅު މީރު ފެންފުށި ކައިރި އޮންނަ ދިއްފުއްޓަކީ ގެސްޓްހައުސްގެ ވިޔަފާރި ފުޅާވަމުން އަންނަ ރަށެކެވެ.
