ގައުމީ އިނާމު ގައުމީ ދުވަހު ދޭ ގޮތަށް، ނަން ހުށައެޅުން ޖޫން 10 ގައި
ގައުމީ ދުވަހު ގައުމީ އިނާމު ދޭގޮތަށް ނިންމެވީ ރައީސް ސޯލިހު
ދެހާސް އަށާރަ ވަނަ އަހަރުގެ ގައުމީ އިނާމު ދިނުމުގެ ހަފްލާގެ ތެރެއިން
ސަރުކާރުން ކޮންމެ އަހަރަކު ދެމުންގެންދާ ގައުމީ އިނާމު މިއަހަރުން ފެށިގެން ޤައުމީ ދުވަހު ދޭ ގޮތަށް ހަމަޖައްސައި، މި އަހަރު ގައުމީ އިނާމަށް ނަން ހުށަހެޅުމުގެ ފުރުޞަތު އަންނަ ޖޫން މަހުގެ 10 ވަނަ ދުވަހަށް ހުޅުވާލާފިއެވެ.
ނަވާރަސަތޭކަ ހަތްދިހަ ނުވަ ވަނަ އަހަރު ގައުމީ އިނާމު ދެއްވަން އޭރުގެ ރައީސް އަލްއުސްތާޛު މައުމޫން ޢަބްދުލްޤައްޔޫމްގެ ސަރުކާރުން ފެށްޓެވިއިރު، އެ އިނާމު ދެމުން ގެންދިޔައީ މިނިވަން ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ. ފަހުން ޖުމްހޫރީ ދުވަހުގެ ރަސްމީ ޖަލްސާގައި އިނާމު ދޭގޮތަށް ހަމަޖެއްސެވީއެވެ.
ބުދަ ދުވަހު ރައީސް އޮފީހުން ބުނީ، ގައުމީ ދުވަހު ގައުމީ އިނާމު ދޭގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖެއްސެވީ، ގައުމީ އިނާމަކީ ގައުމަށް ތަފާތު އެކި ރޮނގު ރޮނގުން ޚިދުމަތް ކުރައްވާ ބޭފުޅުންގެ އަގު ވަޒަން ކުރެއްވުމުގެ ގޮތުން ދެއްވާ އިނާމަކަށްވާތީ، މި އިނާމު ދެއްވުން އެންމެ އެކަށީގެންވާ މުނާސަބަތަކީ ގައުމީ ދުވަހުގެ މުނާސަބަތު ކަމަށްވާތީ ކަމަށެވެ.
މި އަހަރު ގައުމީ އިނާމަށް ނަން ހުށަހެޅުމުގެ ފުރުޞަތު، އަންނަ ޖޫން މަހުގެ 10 ވަނަ ދުވަހު ގައުމީ އިނާމާ ބެހޭ ކޮމިޓީން ހުޅުވައިލާ ގޮތަށް މިހާރު ނިންމާފައިވާ ކަމަށް ރައީސް އޮފީހުން ބުންޏެވެ.
ގައުމީ އިނާމު މިހާރު ދެވޭ މައިގަނޑު ދާއިރާތަކާއި، ރޮނގުތަކާ ގުޅޭ ގޮތުން ކަމާބެހޭ އިދާރާތަކުގެ ޚިޔާލު އެ ކޮމިޓީން މިހާރުވަނީ ހޯދާފައެވެ. ޤައުމީ އިނާމުގެ އުޞޫލުތަކަށް ގެންނަން އިތުރު ބަދަލުތައް ގެންނެވުމުގެ މަސައްކަތް، އެ ކޮމިޓީން ކުރަމުންދާ ކަމަށް ރައީސް އޮފީހުން މައުލޫމާތުދެއެވެ.
ރައީސް އޮފީހުން ބުނީ، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ އިނާމާއި، ރައީސުލްޖުމްހޫރިއްޔާ ދެއްވާ ޚާއްޞަ އިނާމުތައް ދޭނީ މިހާރެކޭވެސް އެއްގޮތަށް ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައި ކަމަށެވެ.
