ޒަހްރާން މަރުވިކަން ޑީއެންއޭ ޓެސްޓުން ޔަގީންކޮށްދީފި
22 މެއި 2019 | ބުދަ 06:18ޒަހްރާންގެ އަންހެން ދަރިފުޅުގެ ޑީއެންއޭއާ އޭނާގެ ޑީއެންއާ ދިމާވޭ
ޒަހްރާން ހާޝިމް
ސްރީލަންކާގެ އީސާއީ ދީނުގެ މީހުން އަޅުކަން ކުރާ ފައްޅިތަކާއި މަތީ ފަންތީގެ ހޮޓާ ތަކަށް އޭޕްރީލް މަހުގެ 21 ވަނަ ދިން ހަމަލާގެ މޭސްތިރިޔާ ޒަހްރާން ހާޝިމް މަރުވިކަން ޑީއެންއޭ ޓެސްޓުން ޔަގީން ކުރެވިފައިވާ ކަމަށް އެގައުމުގެ ސަރުކާރުގެ ތަހުލީލު ޑިޕާޓްމެންޓުން ބުނެފިއެވެ.
އެތަނުން ބުނީ، ޒަހްރާންގެ ޑީއެންއޭއާ އޭނާގެ އަންހެނުންގެ އިތުރުން ދަރިފުޅުގެ ޑީއެންއޭ ދިމާވެފައިވާ ކަމަށާއި، އަމިއްލަ ހަށިގަނޑު ގޮއްވާލައިގެން ކޮޅުނބުގެ ޝަންގްރިއްލާ ހޮޓަލަށް ދިން ހަމަލާގައި ނޭޝަނަލް ތައުހީދު ޖަމާއަތުގެ ލީޑަރު ޒަހްރާން މަރުވެފައިވާ ކަން ޔަގީންވެފައިވާ ކަމަށެވެ.
ޒަހްރާންގެ ޑީއެންއޭ ޓެސްޓް ހަދާފައިވަނީ އޭނާ މަރުވިކަން ކަށަވަރު ކުރުމަށް ކޯޓުން ކުރި އަމުރަކާއި ގުޅިގެންނެވެ. ޒަހްރާންގެ އަންހެނުންނާއި ދަރިފުޅު ސަލާމަތްވެފައި ވަނީ ސައިންތަމަރުތު އަވަށުގައި ސިފައިންނާއި ހަތިޔާރު އަޅައިގެން ތިބި ބަޔަކާ ދެމެދު ހިނގި ކުރިމަތިލުންތަކެއްގައެވެ.
ތަހުލީލު ޑިޕާޓްމެންޓުން ބުނީ، ޝަންގްރިއްލާ ގައި ބޮންގޮއްވާލި ސަރަހައްދުން ފެނުނު ޒަހްރާންގެ ހަށިގަނޑުގެ ބައިތަކާއި އޭނާގެ އަންހެން ދަރިފުޅުގެ ލޭގެ ސާމްޕަލްއާ ދިމާވެފައިވާ ކަމަށެވެ.
އެކަމުގެ ރިޕޯޓް ސީއަޑީ ޑިޕާޓްމެންޓާ ހަވާލުކޮށް އެ ރިޕޯޓް ކޯޓަށް ހުށައެޅުމަށް ވަނީ ހަމަޖެހިފައެވެ. އަންގާރަ ދުވަހު ބޭއްވި ޕްރެސްކޮންފަރެންސް ގައި ވާހަކަދައްކަމުން ފުލުހުންގެ ތަރުޖަމާނު ރުވާން ގުނަސޭކަރަ ވިދާޅުވީ، ހަށިގޮއްވާލައިގެން ހަމަލާދިން ހުރިހާ އެންމެންގެ ވަނަވަރު އެމީހުންގެ ޑީއެންއޭއިން ދެނެގަނެފައިވާ ކަަމަށެވެ.
ޑީއެންއޭ ސާމްޕާލްތައް ދައްކާ ގޮތުން ޝަންގްރިއްލާއާ ސިނަމޮން ގްރޭންޑް ހޮޓަލަށް ހަމަލާދިން ދެބެއިން ކަމަށްވާ މުހައްމަދު އިބްރާހިމް އިލްހާމް އަހުމަދުއާ މުހައްމަދު އިބްރާހިމް އިންޝާފް އަހުމަދުގެ ޑީއެންއޭ ބައްޕަ އިބްރާހިމްއާ ދިމާވޭއެވެ. ބާކީ ތިބި ޓެރަރިސްޓުންގެ ޑީއެންއޭވެސް ދިމާވާކަމަށް ފުލުހުންގެ ތަރުޖަމާނު ވިދާޅުވިއެވެ.
