އެސްޓީއޯގެ ޑިރެކްޓަރުންގެ ބޯޑަށް ބަދަލުތަކެއް ގެނެސްފިއެވެ.
އެ ކުންފުނީގެ ބޯޑަށް މި ބަދަލުތައް ގެނެސްފައިވަނީ އެ ކުންފުނިން ބޭއްވި އަހަރީ އާންމު ޖަލްސާގައެވެ. އެސްޓީއޯ އިން ބުނީ އެ ކުންފުނީގެ ބޯޑަށް ބަދަލު ގެނެސްފައިވަނީ ޕްރައިވަޓައިޒޭޝަން ބޯޑުން އަންގާފައިވާތީ ކަމަށެވެ.
އެގޮތުން އެސްޓީއޯގެ ބޯޑަށް ސަރުކާރުން އައްޔަނު ކޮށްފައިވާ ފަރާތްތަކަކީ އެ ކުންފުނީގެ ޗެއާމަންއަކަށް ހާމިދު ނަޝީދު މުހައްމަދު، އެގްޒެކެޓިވް ޑިރެކްޓަރަކަށް މުހައްމަދު މިހާދުއެވެ. އަދި ކުންފުނީގެ ބޯޑު މެމްބަރުންނަށް ގައިސް އިސްމާއިލް، ޝިމާދު އިބްރާހިމްގެ އިތުރުން އިސްމާއިލް ޖުމައިލް ރަޝީދު ވަނީ ހަމަޖައްސާފައެވެ.
އެސްޓީއޯގެ ބޯޑަށް އާންމު ހިއްސާދާރުންގެ ތެރެއިން މެންބަރަކު އައްޔަނު ކޮށްފައިވާއިރު އާންމު ހިއްސާދާރުން ތަމްސީލު ކުރާނެ މެންބަރަކަށް އައްޔަނު ކޮށްފައިވަނީ އާމިނަތު ރުޝްމާއެވެ.
މިދިޔަ އަހަރު އެސްޓީއޯ އަށް ސާފު ފައިދާގެ ގޮތުގައި 224 މިލިއަން ރުފިޔާ ލިބިފައިވެއެވެ.
