ހުޅުމާލޭގައި ޖިމްގެ ހިދުމަތް ދިނުމަށްޓަކައި އެންމެ ފުރަތަމަ ހުޅުވި ފިޓްޒޯން އިން 'މެގަ ސޭލް' ފަށައިފިއެވެ.

މި ސޭލްގެ ދަށުން އެއް މަހު ޖިމް ނުވަތަ ކްލާސްތަކަށް 888ރ. އަދި އެއް މަހު ޖިމްއާ އެކު ކްލާސްތަކަށް 999ރ. ގެ އިތުރުން ތިން މަސްދުވަހު ޖިމްއާ އެކު ކްލާސްތަކަށް 1،999ރ. ގެ ޕެކޭޖްތަކެއް ވަނީ ތައާރަފުކޮށްފައެވެ.

މެގަ ސޭލް މި މަހުގެ 25 ވަނަ ދުވަހުގެ ނިޔަލަށް ކުރިއަށްދާއިރު މިހާރު ވެސް ގިނަ ބައެއްގެ ތަރުހީބު ލިބެމުންދާ ކަމަށް ފިޓްޒޯނުގެ މެނޭޖިން ޑިރެކްޓަ އަހުމަދު ރިޔާޒް ވިދާޅުވިއެވެ. އަދި މިޕެކޭޖްތަކާ ބެހޭ މައުލޫމާތު ފިޓްޒޯން އަށް ގުޅައިގެން ނުވަތަ އެތަނަށް ޒިޔާރަތް ކުރުމުން ވެސް ފޯރުކޮށްދޭނެ ކަމަށް އޭނާ ވިދާޅުވިއެވެ.

މީގެ އިތުރުން މި ރަމަޟާން މަހަށް ހާއްސަކޮށްގެން ޕްރޮމޯޝަނެއް ވެސް ފިޓްޒޯންގެ ފަރާތުން ވަނީ ކުރިއަށް ގެންގޮސްފައެވެ.

ރިޔާޒް ވިދާޅުވީ ރަމަޟާން މަހަށް ހާއްސަކޮށްގެން ޕްރޮމޯޝަނެއް ފަށާފައި ވަނީ ރަމަޟާން މަހުގައި ވެސް ގިނަ ބަޔަކު ހަށިހެޔޮ ދުޅަހެޔޮ ސިއްހަތެއްގައި ބޭތިއްބުމަށް މަގު ފަހިކޮށްދިނުމަށާއި އަދި ރަމަޟާން މަހަކީ އެހެން މަސްމަހަށް ވުރެ ހަރަދު ބޮޑު މަހަކަށް ވެފައި ޖިމް ބޭނުން ކުރާ ފަރާތްތަކަށް ލުޔެއް ދިނުމުގެ ގޮތުންނެވެ. އެހެންކަމުން އަލަށް މި ފެށި މެގަ ސޭލްއަކީ ކުރިން ހުރި އަގުތަކަށް ވުރެ ވަރަށް ބޮޑުތަން އަގު ހެޔޮކޮށް ކުރިއަށްގެންދާ ސޭލްއެއް ކަމަށް ރިޔާޒް ވިދާޅުވިއެވެ.

މީގެ އިތުރުން ފިޓް ޒޯނަކީ ތަފާތު ގިނަ ޕްރޮގްރާމްތަކެއް ހިންގަމުންގެންދާ ތަނަކަށްވާ އިރު ފިޓް ޒޯން އިން ކުރިއަށްގެންދާ ގުރޫޕު ފިޓްނަސް ޕްރޮގްރާމްތަކަށް ވެސް ބޮޑު ތަރުހީބެއް ލިބެމުން އަންނަ ކަމަށް ރިޔާޒް ވިދާޅުވިއެވެ.

ގުރޫޕުގެ ފިޓްނަސްގެ ދަށުން ފިޓް ޒޯނުން ވަނީ ސްޓޫޑިއޯއެއް ވެސް ހުޅުވާފައެވެ. އަންހެނުންނާއި ފިރިހެނުންނަށް ވަކިން ކްލާސްތައް ހިންގަމުން ގެންދާއިރު، ސްޓީލް ކޮމްބެޓް، ސްޓީލް ޓޮނިކް، ސްޓީލް ޓްރެއިނިން ޕްރޮގްރާމް، ޒުންބާ ކުރިއަށް ގެންދެއެވެ.

ފިޓްޒޯނުން އަންނަނީ ޕާސަނަލް ޓްރެއިނަރުންގެ ހިދުމަތް ވެސް ދެމުންނެވެ. އެގޮތުން ޕާސަނަލް ޓްރެއިނަރުންގެ އަގުތައް އުޅެނީ 2000ރ. އާއި 3000ރ. އާ ދެމެދުގަ އެވެ.

ރަމަޟާން މަހު ޖިމް ހުޅުވާފައި ހުންނާނީ ހުކުރު ދުވަސް ފިޔަވައި ހަވީރު 16:00 އިން އިރު އޮއްސި 18:00 އަދި ރޭގަނޑު 19:00 އިން ފެށިގެން ދަންވަރު 1:00 އަށެވެ.